Overblog Suivre ce blog
Editer l'article Administration Créer mon blog
29 janvier 2014 3 29 /01 /janvier /2014 14:29

De sangsugas pels milions…

La paur de la pagina blanca, per çò que concernís aquelas regas, l’ai pas gaire. Sabi que serai salvat per l’actualitat que, gaireben tot còp, passa çò qu’auriái pogut imaginar. Donc quand me meti devant l’ordenador, ensagi de far la tria demest los eveniments per ne causir un que poiriá interessar lo legeire e que seriá pas a la Una de la màger part dels autres mèdia. Escomesa impossibla per çò que soi pas mai aluserpit que los autres ! Vos auriái donc parlat del carri de l’Estat qu’avança « contra vents e subèrnas » o de la tendéncia dels òmes politics a la procrastinacion – mot impossible de prononciar ! – quitament se son pas los sols quand, en me passejant sus la tela, legiguèri que lo « gigant de Califòrnia [aviá] vendut mens de telefonets intelligents que [çò qu’aviá] previst ». Solide, los darrièrs tres meses, aviá fach tretze miliards de profièches mas aquestes èran pas mai gròsses que los de 2012. En mai d’aquò, pareisseriá que « sas perspectivas pel primièr trimèstre de 2014 serián en deçai de las previsions ». Los que legisson lo « Wall Street » dins lo tèxte auràn lèu fach de comprene perque los accionaris e los investisseires subretot, tiran lo morre. Tanlèu los resultats coneguts, l’accion del gigant cabussèt de 8 %. Coma una « catastròfa » ven pas jamai soleta, lo big boss daissa esperar pas qu’una chifra d’afars de 44 milions de dòlars mentre qu’èran previstes 46 per aqueste trimèstre. En mai d’aquò, fa quatre annadas que la « Poma » a pas sortit res qu’existissiá pas ja avant. Malgrat mai de tres dòlars de dividend per accion, los qu’an metut de moneda dins l’afar vòlon un retorn sus investiment encara mai grand. Qué far per ajudar aquel paure monde ? Crompar un seisen ordenador, un tresen telefonet o una quatrena lausa ?

Editorial de La Setmana, n°954

Partager cet article

Repost 0
Andriu de Gavaudan
commenter cet article

commentaires

Presentacion

  • : Le blog de Andriu de Gavaudan
  • Le blog de Andriu de Gavaudan
  • : Actualitat en lenga occitana Lenga e cultura occitanas (occitan ancian e modèrne)
  • Contact

Recèrca