Overblog Suivre ce blog
Editer l'article Administration Créer mon blog
15 février 2014 6 15 /02 /février /2014 15:56

Escambiar los presidents ?

Vòli pas dire mas i a quicòm que va pas amb la faiçon d’elegir los caps d’Estat … en França al mens !

Prenèm nòstre president François. Cada jorn, es ara vengut la mòda, los sondatges comandats per un o per l’autre demòstran que la popularitat del president es pas jamai estada autan bassa.

E, per far bona mesura, lo primièr ministre e totes los membres del govèrn – levat los passa-muralhas – fan partida del questionari. Aital, los sondats balhan lor punt de vista sus tal o tal.

Coma soi pas jamai estat sondat ni per telefòn ni per carrièra, vos dirai pas qualas son las questions ni se vos demandan de respondre per òc o per non o se vos laissan desvolopar vòstra pensada.

Personalament, me sembla – e ne soi segur ! – que poiriái dire de òc o de non pel president e pel primièr ministre e tanben per quatre o cinc ministres d’aqueste govèrn mas que seriái fòrt embarrassat per totes los autres que ne coneissi quitament pas la cocura.

Se En Valls se passeja per carrièras, quitament sens sos garda-espaldas, li serà pas aisit de passar incognito. Sas admiratrices o sos criticaires auràn lèu fach de lo reconèisser : demandas d’autografas e envejas d’escopits se farián rampèl !

Na Taubira corririá de riscas identicas mas per d’autres motius ; e sa color de pèl ajudariá pas se trapèsse demest los manifestants del « maridatges per totes » !

Per nòstre president, es quicòm de diferent. Son visatge, leugièrament rojàs, atira la simpatia naturalament. La faiçon qu’a de jamai èsser peta-sec e de fugir los afrontaments li permet a priori de passar entre las gotetas d’un delavaci ! Mas sufís pas per èsser popular.

Totas las decisions que pren son contestadas e pels electors, e pels sindicats, e per un fum d’autres grops. Los quites deputats de sa majoritat repotegan.

Cal que nòstre president ane en defòra del país, visitar Barack – en dificultat dins son país –, per trapar de mond que li fagan qualques sorrires e mimicas de benvenguda. E François es pas una excepcion. Se prenèm totes los que son estats al poder abans el, es tot parièr : Sarközy l’American, Chirac la man al cuol de las vacas, Mitterrand, alias tonton e mai tard Dieu. Totes an degut anar a l’estrangièr cercar un pauc de solaç !

Una idèa de seguir benlèu : escambiar los presidents – coma al fotbòl los jogaires – o, pels electors, elegir los presidents dels autres païses !

Cronica occitana

Le Petit Bleu de Lot-et-Garonne

dimenge, lo 16 de febrièr de 2014

Partager cet article

Repost 0
Andriu de Gavaudan
commenter cet article

commentaires

Presentacion

  • : Le blog de Andriu de Gavaudan
  • Le blog de Andriu de Gavaudan
  • : Actualitat en lenga occitana Lenga e cultura occitanas (occitan ancian e modèrne)
  • Contact

Recèrca