Overblog Suivre ce blog
Editer l'article Administration Créer mon blog
1 février 2014 6 01 /02 /février /2014 16:02

Una gara del « chic » parisenc…

Vòli pas dire mas direm pas jamai pro tot çò que devèm a París, la gran vila, la capitala d’un país que se crei encara una poténcia mondiala, etc. (sic)

En cas que d’aubuns m’ajan pres al primièr gra, ajusti de tira qu’aqueste primièr paragraf es una galejada !

E rai se n’i a que fan lo morre per çò que creson encara los discorses servits per nòstres politicians d’esquèrra coma de drecha sus aquel sicut.

Mas l’afar qu’interessa los Ageneses e las gents d’Òut e Garona en general es, de segur, la gara d’Agen-même que ven d’èsser restaurada — « reabilitada » coma se ditz ara en francés ! » — per permetre, d’après çò qu’ai legit, de far la naveta fins a la gara per la LGV a venir que serà en defòra d’Agen.

Personalament, se vesi qualque interès a modernizar la gara e a permetre a totes de se i desplaçar sens problèma — çò qu’es pas estat fach, çaquelà ! — vesi pas cap d’interès a ne far una mena de gara futurista se deu servir pas que per anar a la gara LGV a qualques quilomètres d'Agen-même.

La vòlon, nòstres elegits, aquela gara ; Rousset, lo reiòt d’Aquitània, Dionís, lo comte d’Agen e totes los marqueses, drecha e esquèrra confondudas, qu’an lors abituds a París e que fan d’anar-tornar e que se vòlon trobar mai pròches del poder central, estant qu’un grand país se coneis a son administracion tentaculara qu’arrègla totes los detalhs de nòstra vida, a nosautres simples ciutadans.

S’agís pas de saber s’es de moneda degalhada o pas. Que non pas ! Una ligason rapida amb la capitala del reialme es una necessitat. Lo progrès se discutís pas e nòstres elegits sabon plan melhor que nosautres qual es nòstre interès, es evident !

E, cerièra sul pastís, coma dison en francés, la gara restaurada aurà tornar son bufet « del charme d’autres còps, dins un decòr de braçariá parisenca amb de mòbles contemporanèus ».

La classa ! La classa, vos disi… una gara restaurada e modèrna ara, amb lo chic parisenc en prima. Urosament que pensan a nosautres, nòstres elegits si que non auriam pas jamai pogut profitat del chic parisenc dins nòstre campestre.

Donc, eles van a París per profiechar del chic parisenc e nosautres, l’avèm aicí sus plaça.

Perque anarián a París s’an ja lo chic parisenc sus plaça ? Ai degut mancar quicòm…

Cronica occitana

Le Petit Bleu de Lot et Garonne

Dimenge, lo 2 de fevrièr de 2014

Partager cet article

Repost 0
Andriu de Gavaudan
commenter cet article

commentaires

Presentacion

  • : Le blog de Andriu de Gavaudan
  • Le blog de Andriu de Gavaudan
  • : Actualitat en lenga occitana Lenga e cultura occitanas (occitan ancian e modèrne)
  • Contact

Recèrca