Overblog Suivre ce blog
Editer l'article Administration Créer mon blog
3 août 2014 7 03 /08 /août /2014 00:10

Abolicion dels privilègis !?

Vòli pas dire mas, se nòstres elèits – los que nos govèrnan e los que nos vòlon governar ! – noirisson qualques dobtes sus l’avenidor gloriós del país, en revenja, n’an pas cap quand s’agís de son passat !

Normal, me diretz ; es totjorn mai aisit d’endevinar lo passat que l’avenidor e a n’aquel jòc nòstres elèits son venguts mèstres endevinaires, que sián dins l’oposicion o al govèrn ; e compti pas los elèits de la societat, dicha civila, que coneisson totas las recèptas per tornar a França poder, grandor e respècte internacional…

Fa un brave brieu que nos sèm lançats dins las commemoracions d’una causa o d’una autra ; aquò manja pas de pan e deu far plaser als floristas que vendon las flors !

Sèm donc en plen dins la commemoracion de la declaracion de la guèrra de 14-18 e ne profiecham per celebrar tanben l’assassinat de Jaurés.

M’a totjorn semblat curiós qu’òm celèbre una tanada ! E aquesta, quitament se França ne sortiguèt vencèira gràcia a l’ajuda de qualques autres païses – coma los Estats Units per exemple – e milierats de soldats venguts de nòstras colonias de l’epòca amb la promessa d’èsser de ciutadans franceses de plen exercici un còp lo chaple acabat. Aquestes foguèron colhonats, e lèu doblidats pel colonizator francés que se tornèt sovenir d’eles vint ans mai tard pel segond chaple… Colhonats un jorn, colhonats totjorn !

E se « La democracia a un prètz », coma o aima de dire lo deputat Myard (Ump) en pensant a la moneda que tòca, es çaquelà susprenent que i aja pas cap de grandas manifestacions en sovenir de la nuèch del 4 d’agost que vegèt la « supression dels privilègis… »

De la drecha extrèma a l’esquèrra « mai-a-l’esquèrre-que-ieu-morisses », nòstres elegits trobavan normal, fins ara, d’aver pas cap de comptes a rendre sus lors indemnitats e autras sinecuras se afinitat !

Obligats de declarar çò que ganhan, o an fach amb una maissanta volontat qu’es pas de creire. Los senators fan encara de resisténcia en disent qu’espèran la publicacion dels decrèts d’aplicacion, etc.

E totes, o gaireben, son d’acòrd per cridar aut e fòrt qu’es pas que curiositat malsana de la part de qualques esperits malauts. Quand l’inspector de las Talhas espepissa ma declaracion, fa pròva, el tanben, de curiositat malsana… Li vau dire !

En mai d’aquò, desempuèi quatre ans, l’imposicion sus ma pension – qu’es mon sol revengut – a quadruplat… Vertat es qu’ai agut un fum de privilègis… qu’èri foncionari !

Cronica occitana

Le Petit Bleu de Lot-et-Garonne

Dimenge, lo 3 d'agost de 2014

Partager cet article

Repost 0
Andriu de Gavaudan
commenter cet article

commentaires

Presentacion

  • : Le blog de Andriu de Gavaudan
  • Le blog de Andriu de Gavaudan
  • : Actualitat en lenga occitana Lenga e cultura occitanas (occitan ancian e modèrne)
  • Contact

Recèrca