Overblog Suivre ce blog
Editer l'article Administration Créer mon blog
12 août 2014 2 12 /08 /août /2014 14:19

Cultura, acultura, convivialitat e memòria…

Vòli pas dire mas los legeires del Pichon Blau an d’astre e o sabon pas benlèu !

Mon collèga Le Flâneur (Lo Landrejaire) ven cada jorn, amb sas remarcas sus Agen-même e los environs, far conéisser melhor la vila a sos estatjants e, dins lo meteis temps, donar qualques leçons de saber-viure als arlèris que devon aver una cervèla pas mai gròssa qu’un pese per far çò que fan : daissar la pobèlla defòra tot lo sant clame del jorn, degalhar pòrtas e murs amb lors tags, mancar de civisme, qué, etc.

E, coma es una persona qu’a tot plen d’esperit, o fa amb umor, çò que, ieu, soi pas capable de far… subretot quand soi en colèra !

E i a ieu que, cada setmana, dins ma cronica, vos veni entertenir dels afars del mond o d’autres mai pròches mas en occitan.

Dins son bilhet de dissabte, lo Landrejaire fa valer los luòcs emblematics d’Agen-même, presats fòrt dels Ageneses e dels visitors. Aquò m’interessa a ieu que soi pas Agenés e que, fin finala, coneissi pas la vila quitament se i veni pro sovent.

Fa lo laus de las animacions ageneses e a plan rason ! Se devèm esperar que « nòstras » ràdios e « nòstras » tele nacionala ne parlan, aurem lo temps de secar sus pè ! Quitament, pendent la sason de las vacanças, París demòra, per tot aquel mond, l’endrech ont se passa quicòm, levat qualques vilas envasidas pels comedians venguts de París per portar la cultura als plocs que sèm – d’après eles !

Vertat es qu’es pas tròp aisat en província de la far gralhar, la cultura ! Al mens, la que sembla digna d’interès pels aparisenquits e franchimandejaires.

Las subvencions, se sap, van subretot a qualques grands espectacles parisencs e un chic a los de las vilassas ; vilatges e vilatjòts se devon petaçar amb qualques ajudas autrejadas per la comuna e lo benevolat es la règla.

Mas, en defòra d’Agen, avèm d’animacions tanben… Dins mon ròdol, las seradas mai presadas son las ont i a la possibilitat de manjar e de beure. Per d’unes, s’agís pas de cultura benlèu mas la convivialitat i es la règla, e dins la societat que vivèm es ja fòrça important. Avèm tanben seradas « culturalas » : teatre, cançons e autres… que permeton tanben als vilatgeses de se retrobar. Me cal pas doblidar tanpauc una activitat en plen desvolopaent aquestas darrièras annadas : los voidasolèrs ont cadun ensaja de se desbarrassar dels afars vièlhs e de ne crompar d’autres ! Mas, personalament, tròbi pas qu’aquò siá quicòm d’encoratjar per çò que, quand escampam o vendèm los afars vièlhs, escampam un pauc de la memòria nòstra… E un pòble sens memòria… es un pòble que morís o qu’es ja mòrt !

Cronica occitana

Le Petit Bleu de Lot-et-Garonne

Dimenge, lo 10 d'agost de 2014

Partager cet article

Repost 0
Andriu de Gavaudan
commenter cet article

commentaires

Presentacion

  • : Le blog de Andriu de Gavaudan
  • Le blog de Andriu de Gavaudan
  • : Actualitat en lenga occitana Lenga e cultura occitanas (occitan ancian e modèrne)
  • Contact

Recèrca