Overblog Suivre ce blog
Editer l'article Administration Créer mon blog
28 janvier 2008 1 28 /01 /janvier /2008 15:12
La moneda val d’argent !
 
Es pas per dire mas i a de novèlas que, de d’òra lo matin, vos laissan coma palaficat ! La setmana passada, Daniel Bouton, lo PDG de la Société générale portèt a la coneissença del public – e subretot de sos clients – que la banca veniá de pèrdre a l’entorn de dos miliards d’euros per aver « jogat » amb los crèdits subprimes en America e qu’en mai d’aquò veniá de s’apercebre qu’un de sos emplegats, un trader, en carga d’operacions financièras, aviá fach pèrdre a la banca mai o mens cinc miliards d’euros. Ajustèt que l’exercici de l’annada seriá çaquelà positiu amb gaireben un miliard d’euros de beneficis. Entendre aquò quand sètz dejun es dificile a engolir per qualqu’un coma ieu ; ai totjorn avut problèmas amb ma banca e mon banquièr, que  m’aima fòrça, me ditz de contunh que seriá melhor qu’agèssi mon compte corrent positiu. E mai li expliqui que mon poder de crompa se demesís un pauc mai cada jorn pr’amor de l’aumentacion del panièr de la femna de l’ostal (sic), me rebeca qu’es pas son problèma…
Sèt miliards de pèrdas e ne demòra pr’aquò un milion en excedent ! A l’escòla primària, nos ensenhavan que, per escriure la chifra « un miliard », caliá 9 zèros après lo « 1 » … Libération, mai practic, nos ditz qu’amb cinc miliards, podèm crompar 3200 Falcon 900 (l’avion que Bollorè prestèt a Nicolas per sas vacanças) 107 267 Patek Philippe (la mòstra que Carla Bruni ofriguèt a Nicolas) o 35 714 285 Ray-Ban Aviator (las lunetas de Nicolas), etc. Dins aquel afar, i a quicòm de desconvenent per las gents ordinàrias qu’an de mal a comprendre cossí aquel trader – s’es estat solet – a poscut « jogar » amb de miliards malgrat totes las proceduras de contraròtle. Lor i demòra pas qu’a tornar metre son argent entre dos linçòls dins l’armari…

Editorial de La Setmana, n°648

Partager cet article

Repost 0
Andriu de Gavaudan - dans Anar del mond
commenter cet article

commentaires

Presentacion

  • : Le blog de Andriu de Gavaudan
  • Le blog de Andriu de Gavaudan
  • : Actualitat en lenga occitana Lenga e cultura occitanas (occitan ancian e modèrne)
  • Contact

Recèrca