Overblog Suivre ce blog
Editer l'article Administration Créer mon blog
8 février 2008 5 08 /02 /février /2008 00:18
De blanc vestida…
 
Alleluia, qu’es hèit ! Un còp ne hè pas puta… Nicolas Ièr, qui avèva dit en conferéncia de premsa que « damb Carla, [qu’èra] quaucom de hèra seriós », qu’a tengut la soa promessa de n’anonciar pas lo son maridatge sonque un còp la ceremonia acabada… Qu’èm urós tad eth après autant d’espròvas en quauques mes que n’avèm tots seguit los episòdis gràcias a la soa politica de transparéncia… La hemna qu’aima mei que tot qu’ac dèisha tot entà córrer la patanteina ; lo son retorn au domicili e lo bonur « en Prada » retrobat ; la familha recompausada, lo bais suus pòts après la ceremonia d’intronizacion ; l’abséncia de l’aimada au son costat pr’aquò dens las manifestacions oficiaus dens lo periòde qui segueish ; e, après un suspense – digne de Hitchcock – relaiat per los mèdia, matin, mièijorn e ser, lo despart de l’aimada per un anonimat qui volèva tant… Un òme demorat sol, ablasigat, desesperat, qui s’a perdut lo dromir – e benlèu ben, lo beure e lo minjar – e qui ne sap pas mei on penjar lo lum dinc a… lo son enamorament subte d’ua estrangèra « bèra com lo jorn »… Mès que coneishetz la fin – provisòria ? – de l’istòria.
Apasimat e après aver complit la rompedura – qui ns’avèva promés – a se medish, Nicolas I
èr que se va poder concentrar suu melhorament de la nòsta vita vitanta. Diluns, deputats e senators, amassats en Congrès, qu’acceptèn ua revision de la Constitucion francesa tà perméter a França de ratificar lo tractat europèu de Lisbona. e, dens quauques mes, après l’intermèdi eslovèn, França tornarà gavidar Euròpa en… plea majestat ! Que veiram doman, devant los nòstes uèlhs esbalausits, los païses europèus reconéisher los meritis grans d’una Italiana dens la construccion europèa.
E tric trac, mon conte es acabat…

Editoriau de La Setmana, no 649

Partager cet article

Repost 0
Andriu de Gavaudan - dans Anar del mond
commenter cet article

commentaires

Presentacion

  • : Le blog de Andriu de Gavaudan
  • Le blog de Andriu de Gavaudan
  • : Actualitat en lenga occitana Lenga e cultura occitanas (occitan ancian e modèrne)
  • Contact

Recèrca