Overblog Suivre ce blog
Editer l'article Administration Créer mon blog
2 août 2008 6 02 /08 /août /2008 01:00
Un festenal d’escondons ?

La setmana passada, i aguèt un eveniment fòrça important pels païses d’òc mas tanben important dins la vida culturala exagonala.
Benlèu avètz pas entendut parlar de l’Estivada 2008 – quatrena biennala de las culturas dels païses d’òc –  de Rodés (Avairon). E cal notar que, entre doas biennalas, i a pr’aquò un festenal qu’amassa gaireben autant de monde coma per la biennala.
Ongan, aquela fèsta ramosèt encara mai de monde – mai de quaranta mila de segur – que las annadas d’abans dins un ambient coma se’n vei pas gaire enlòc mai e amb una particularitat granda : totes los espectacles, conferéncias, etc. son a gratis ! Sonque las « neurituds terrestras » son a pagar e es un plaser de poder descobrir la cosina de l’endrech siá a l’estivada siá dins los restaurants de Rodés.
E òc, a gratis ! En aquel temps de caréncia, es quicòm de notar.
Se los Occitans se fan un plaser de i anar, i a pas sonque eles ; las gents venon d’un pauc pertot e fan lo vai e vèni pendent tota la setmana del matin al ser ; lo qu’ensajariá de o veire tot o poiriá pas, aguèsse quitament lo don d’ubiquitat.
La gratuitat es una causa mas vòl pas dire que tot aquò còsta pas res. Es aquí lo « miracle » ! : Las regions qu’an la lenga d’òc en partatge pagan la venguda dels artistas e dels conferencièrs, etc. E de regions, aquò ne fa : Aquitània, Auvernhe, Lemosin, Lengadòc-Rosselhon, Miègjorn-Pirenèus, Provença-Còsta d’Azur, Ròse-Aups sens doblidar las valadas occitanas d’Itàlia e la Val d’Aran (Espanha). Aqueras doas darrièras regions an, mai que las autras benlèu, la consciéncia de lor occitanitat, en particular pr’amor que lor especificitat occitana es reconeguda per Roma (e la region de Lombardia) per la primièra e per Madrid (e subretot la generalitat de Catalonha) per la segonda.
Las regions balhan moneda mas tanben mantun conselh general et mantuna municipalitat per qu’aquesta fèsta siá una capitada.
Los organizators fan un trabalh formidable per ramosar totas aquelas gents. I a pr’aquò quicòm que me tafura : levat los mèdias locals dins las paginas localas, ges de mèdium nacional n’a anonciat abans o parlat pendent o balhat un resson après d’una manifestacion que recampa milierats de monde …
Mas devi èsser una lenga de sèrp e deu èsser la fauta als organizators qu’an planhut los sagèls per enviar l’informacion o alara los corrièrs que se son perduts. Si que non, pensatz ben que nòstres mèdias nacionals se serián fach un plaser de promòure aquel festenal, tot entièr consacrat a la lenga e a la cultura d’òc !


Cronica occitana pareguda dins
Le Petit Bleu de Lot-et-Garonne
e La Dépêche du Midi (Lot-et-Garonne)
lo dimenge 3 d'agost de 2008


Partager cet article

Repost 0
Andriu de Gavaudan - dans Anar del mond
commenter cet article

commentaires

Presentacion

  • : Le blog de Andriu de Gavaudan
  • Le blog de Andriu de Gavaudan
  • : Actualitat en lenga occitana Lenga e cultura occitanas (occitan ancian e modèrne)
  • Contact

Recèrca