Overblog Suivre ce blog
Editer l'article Administration Créer mon blog
10 décembre 2010 5 10 /12 /décembre /2010 10:31

Que i a plan longtemps que n'èi pas hicat tèxtes de literatura "locala" ; aquí qu'atz un tèxte de A. Tozy (1852-1911), felibre neraqués (Nerac, Òut e Garona) pres dens Fablos putsados a la hount.

 

LO PINÇAN E LA CARDINA

En li véser tan bona mina
Dens sa pelha de sheis colors,
Devant mèste Verdon, un Pinçan amorós,
Un bèth matin d’abriu, esposèt la Cardina.    4
Los parents deu Pinçan li avèn plan dit : « Mainatge,
Qu’as enqüèra léser de pensar au maridatge.
Reflechís ; e’t presses pas tan.
N’ès pas Cardinat, qu’ès Pinçan.    8
Las Cardinas son pas d’ua raça païsana ;
Que troberàs mèi tard ua fièra Pinçana,
L’esposeràs s’es a ton gost,
E, damb era, seràs urós. »    12
Mès, maugrè pair e mair, lo còr ensorcelat
Nòste Pinçan que hascot a son cap.
...........................................................................
Tot marchèt bien d’abòrd ! ... Dens la lua de mèu,
De prüèr en prüèr, de branquèu en branquèu,     16
Nòstes joens maridats, en se bequetejar,
Passèn lo mes de mai sens jamès s’avejar.

Òr, un tantòst de junh, dens un planton hlorit,
Lo Pinçan qu’entenot un Cardinat hardit    20
Shiular quaques tirits de  caps a sa Cardina !
Aquò li plasot pas : « D’aqueth Cardinat,
T’angues pas au mens copar lo cap.
Au diable, dèisha-li bresilhar sa cançon    24
E desgrüar son seniçon.
Nosauts, anem dromir. »
Mès quan, lo lendoman,
Au levat deu sorelh, lo malurós Pinçan    28
Volot revelhar sa Cardina,
En la trobar pas au son costat,
Que comprengot que la coquina
Qu’avè seguit lo Cardinat.    32
.................................................................
E de’s véser lavetz tan mespresat peu sòrt ;
Nòste praube Pinçan ende cercar la mòrt,
E’s vòu parsar lo còr damb lo bròc d’un cardon,
Quan se torna trobar devant mèste Verdon.    36
« Verdon, ça li digot, qu’èi perdu ma fimèla.
Que soi desesperat, que’m vau parsar lo còr.
— Pensi mèi lèu qu’as perdut la cervèla,
Ditz lo Verdon, morissan pas d’aquò.    40
Aten dinca doman, aten ua setmana,
De ta dolor lo temps que’t guarirà.
E, au mes d’aost, au braç d’ua pinçana,
Chès tos parents qu’angueràs niserar.    44
En la véser tan muscadina,
Quan as esposat la Cardina
Qu’as cresut esposar un tresòr.
Tira profit de ta misèra,    48
Aprengueràs que sus la tèrra...

Moralitat

Tot çò que lusís n’es pas òr.

 

 

Grafia (a còps : cacografia) de l'autor

 

 

LOU PINSAN E LA CARDINO

En li bese tan bouno mino
Dens sa peillo de ches coulous,
Deouan meste Berdoun, un pinsan amourous,
Un bet matin d’abriou, espousait la cardino.    4
Lous parens dou pinsan li aouen plan dit : « Maynadye
« Cas encouèro lese de pensa aou maridadye.
« Réfléchis et presses pas tan,
« N’ès pas cardinat, qu’ès pinsan.    8
« Las cardinos soun pas d’uo raço paysanno ;
« Que trouberas mè tard uo fièro pinsanno,
« L’espouseras s’es a toun gous,
« E dam’bero seras hurous. »    12
Mè maougre pay e may, lou co ensourcelat
Noste pinsan que ascout a soun cat.
...................................................
Tout marchèt bien d’abord !… Dens la luo de meou
De pruè en pruè, de branquèou en branquèou,    16
Nostes jouens maridats en se bequeteja,
Passen lou mes de may sans jamè s’aoueja.

Or un tantos de jun dens un planton lourit,
Lou pinsan qu’entenout un cardinat hardit,    20
Chioula caouques tirits decats à sa cardino !…
Aco li plasout pas. Ero, touto calino
Li respoun : « D’aquet cardinat
T’angues pa aoumen coupa lou cat.    24
Aou diable dècho li bresilla sa cansoun
E desgrua soun senissoun.
Nous aous anèn droumi. » Mè quan lou lendouman
Aou leouat dou soureil lou mahurous pinsan    28
Boulout rebeilla sa cardino,
En la trouba pas aou soun coustat,
Que coumprengout que la couquino
Qu’aouè seguit lou cardinat.    32
..........................................................
E des bese labets tan mesprésat pou sor,
Noste praube pinsan en de serca la mor,
Es bo parça lou co dan lou brot d’un cardoun,
Quan se tourno trouba deouant meste berdoun.    36
Berdoun salidigout : « Qu’ey perdut ma fimèlo.
“Que souy desesperat, qu’en baou parça lou co ».
— Pensi mè lèou qu’as perdut la cervelo,
Dits lou berdoun, mourisson pas daco.    40
Atten dinco doman, atten uo semano,
De ta doulou lou tens qu’et ouarira.
E aou mes d’aous aou bras d’uo pinsano,
Che tous parens qu’angueras nisera.    44
En la bese tan muscadino
Quan as espousat la cardino
Qu’as cresut espousa un tresor.
Tiro proufit de ta misèro,    48
Apprengueras que sur la tèrro…

Moralitat

Tout ço que lusis ne pa or…

Partager cet article

Repost 0
Andriu de Gavaudan - dans Literatura
commenter cet article

commentaires

Presentacion

  • : Le blog de Andriu de Gavaudan
  • Le blog de Andriu de Gavaudan
  • : Actualitat en lenga occitana Lenga e cultura occitanas (occitan ancian e modèrne)
  • Contact

Recèrca