Overblog Suivre ce blog
Editer l'article Administration Créer mon blog
10 avril 2013 3 10 /04 /avril /2013 17:55

Lo primtemps tornarà, e mai siá un pauc tardièr ongan !

Lo Diccionari d'expressions e locucions occitanas [Maurici Romieu, Andrieu Bianchi, Loís Gaubèrt] espelirà, e mai siá plan tardièr !

Vos contarai un jorn benlèu las tribulacions dels autors qu'an tornat legir e repassar, modificar e trencar… un dotzenat de còps un obratge que fa mai de sèt cents paginas…

Tot aquò a pres plan mai de temps que lo temps que met una elefanta per donar naissença a son elefanton… Devi reconéisser qu'exagèri un pauc que la gestacion dura pas que doas ans apr'aquí…

Notatz que, dempuèi que los autors an quitat de trigossejar amb lo tèxte, an amassat un pauc mai de tres cents expressions o locucions  novèlas que seràn pas dins lo diccionari…

L'aventura de l'escritura de l'obratge comencèt en 2005, al mes de mars… e, se tot va plan, se deuriá acabar al mes de mai de 2013…

 

Anem ! Ne vos balhi una darrièra…

 


GAMMA n. f.
Seria de nòtas de musica.

 
◊ Èsser de gamma | de bona gamma « èsser de bona umor ; aver bon caractèr ».

 
Se vòls, pòdes esperar que lo paire siá de bona gamma per li parlar d’aquel afar mas pensi pas que te diga de non.


« Me pareis, Astrugueta, que siás pas de gamma, aqueste ser.
– Mas si, papà, vos asseguri.
– Ai ! Per un ser de Nadal ! […] Quand tot canta e se regaudís, tu m’as la cara pensamentosa e tristonèla. »  (E. Mouly, Legendas)


     DPF • Gámo :    èstre    de    bona    gamma.
     TDF • Gamo :    èstre    de    bona    gamma.
 

 

Lo nom gamma ven, coma lo francés « gamme » de gamma – γάμμα – qu’es lo nom de la tresena letra de l’alfabet grèc Γ, γ. A l’Edat Mejana, designava, coma ut, la primièra nòta de la gamma e, per alargament, la gamma entièra. Aquesta locucion s’emplega per una persona ; l’emplec de l’adjectiu bon, bona refortís lo sens positiu. A l’origina, la locucion a, plan segur, lo sens de « èsser dins lo ton, èsser prèst a cantar ». Coma lo fach de cantar es, generalament, la manifestacion exteriora d’un estat gaujós, la locucion a pres, metaforicament, lo sens de « èsser de bona umor ».

 

Podèm donc totes èsser de gamma per çò que nos demòra pas tròp longtemps per que lo libre crèbe l'uòu…

Partager cet article

Repost 0
Andriu de Gavaudan - dans Lenga
commenter cet article

commentaires

Melania 11/04/2013 08:50


Meti la blanqueta al refregidor

Andriu de Gavaudan 11/04/2013 09:32



L'ai talament vantat aquel diccionari… Espèri que los que lo cromparàn seràn pas decebuts !


L'ai vantat per çò que lo mèstre d'òbra (e sos adjutòris un pauc ça que la) se l'amerita. Pensi que son pas  nombroses encara, e o regrèti, los que, coma Maurici Romieu ensajan de promòure
la lenga en fargant d'apleches tot en occitan (o bilingües al minimum) per permetre a los que seràn, un jorn benlèu, escrivans, poètas, etc. d'emplegar pas una lenga de farlabica.


Seriá curiós que l'occitan foguèsse la sola lenga que se pòsca parlar o escriure corrèctament sens aver d'apleches (lexic, gramatica) per l'apréner ; e se d'unes se planjon de mancar de legeires,
se poirián pausar la question.


Urosament qu'avèm gents coma lo Maurici, lo Florian Vernet de Besièrs o lo Joan Ros de Riberac… Mas sabèm totes que tot çò que tòca a la pedagogia… permet pas de bastir una carrièra amb la
reconeissença que va amb ela !



Presentacion

  • : Le blog de Andriu de Gavaudan
  • Le blog de Andriu de Gavaudan
  • : Actualitat en lenga occitana Lenga e cultura occitanas (occitan ancian e modèrne)
  • Contact

Recèrca