Overblog Suivre ce blog
Editer l'article Administration Créer mon blog
1 juillet 2012 7 01 /07 /juillet /2012 22:56

Femna, femnas, femna…

 

Vòli pas dire mas, per sa primièra virada europèa, Dòna Aung San Suu Kyi a fach un triomfe.

Privada de libertat per la junta birmana pendent un quinzeanat d'annadas, e recentament liberada, es evident que la qu'èra a l'epòca gaireben una icòna – e que l'es venguda encara mai – a suscitat un curiositat granda de la part del mitan politic europèu ; foguèt aculhida, al mens en França, coma un cap d'Estat en visita d'Estat !

Totjorn lo sorrire als pòts, faguèt pròva pendent son empresonament d'una determinacion constanta e d'un coratge bèl. De segur, èra pas detenguda dins una càrcer comuna mas los sols contactes qu'aguèt pendent tot aquel periòde foguèron los qu'èran aprovats per la junta…

Fa que sa visita e sos comentaris èran velhats per totes, sustot coma anoncièt, fa qualque temps, que fasiá fisança – mas los uèlhs dubèrts ! –al president Thein Sein, son carcerièr, per democratizar lo país.

Dins cada país e a cada discors, sa posicion cambièt pas jamai. Caliá ajudar Myanmar (nom de Birmania a l'ora d'ara) a venir un país « normal » e levar las sancions economicas ara que la junta, en la persona de son president, aviá cambiat d’idèa.

Questionada sus la conducha passada dels militars, diguèt que lo passat èra lo passat e que çò que l’interessava èra l’avenidor de son país e de sos conciutadans.

Èra un plaser de veire aquela femnòta de l’aparéncia frèula portar una paraula tan fòrta. E son rescontre amb las « femnas francesas que comptan » al Musèu Marmottan foguèt un moment important amb la societat civila. Conselhs que pòdon semblar ninòis coma lo de  balhar una bona educacion als drollets en lor ensenhar a respectar las femnas…

Sa visita ocultèt un pauc nòstras femnas exagonalas que fan parlar d’elas per de causas que me semblan, a ieu, un pauc ridiculas. Ségolène que ven de far l’experiéncia de la desfacha, desfacha qu’a provocada en se plegant pas a la règla comuna de designacion dels candidats. La companha de nòstre novèl president que ten a demorar « liura » e « femna » a l’encòp mas que sap pas amagar sa gelosiá… Vos ai gardat la remarca d’una tresena, la femna del sénher Valls, « ministre dels trucacolhons » ® [ministèri de l'Interior] que se pausa en s’opausant a la femna del Primièr ministre :  « Soi una femna liura, soi una musiciana coneguda ; es autra causa que d’èsser una professora d’alemand dins la banlèga de Nantes ! » Sens comentari…

Femna, femnas, femna…

 

 Cronica occitana

Le Petit Bleu de Lot-et-Garonne

Dimenge, lo 1er de julhet de 2012

 

 

Partager cet article

Repost 0
Andriu de Gavaudan - dans Anar del mond
commenter cet article

commentaires

Presentacion

  • : Le blog de Andriu de Gavaudan
  • Le blog de Andriu de Gavaudan
  • : Actualitat en lenga occitana Lenga e cultura occitanas (occitan ancian e modèrne)
  • Contact

Recèrca