andriudegavaudan

… Generosa e justa !

Ne l’an pas jamei mençonat dens las reviradas ende ne har pas gelós mès la darrèra causa que hasó lo Bon Diu, avant de se pausar lo setau jorn, qu’estó de crear França. D’aquí lo magistèri morau exercit per França e los sons presidents dens lo domeni de la justícia tà ne pas parlar sonque d’aquò. Chirac que reconegó los crimis del regime de Vichy ; Mitterrand qu’aboliscó la pena de mòrt e Giscard que balhè las soas letras de noblessa a l’acordeon… En seguir lo lor exemple, Nicolas Sarközy que ven d’anonciar que, d’ara en là – e en seguida d’un arrèst deu Conselh d’Estat –, los ancians combatents de las ex-colonias que serviscón devath lo drapèu tricolòr e tocarén la medisha pension militara – pension « cristallizada » desempuish 1958 – que la deus soldats de nacionalitat francesa – revalorizada, era. Decision istorica entà un moment istoric ! Las ex-colonias que ne son a hestejar lo cinquantenari de la lor independéncia e – mèrca de generositat – lo nòste president qu’avèva invitat la lor armada a har lo passacarrèra suus Champs Élysées au parat de la Hèsta  nacionau. De segur, ne son pas sonque un trentenat de milèrs enqüèra vius e las meishantas lengas que disen qu’auré calut esperar  quauques annadas de mei ! Lo nòste president, un parangon de justícia, ne podèva pas mei acceptar aquera situacion inica e que l’a hèit assaber. E que ne i a qui vòlen que los  arreratges de cinquanta ans sian pagats tanben ! N’an pas nada reconeishença tau nòste país qui hè triomfar pertot : libertat, egalitat, fraternitat e… justícia. Ne seré pas susprenent que hasosse aplicar ara la 55^au proposicion – « cristallizada » – deu candidat Mitterrand relativa a la « reparacion istorica » devuda a las lengas istoricas de França. Paciéncia !

Editoriau de La Setmana, n°775