Overblog Suivre ce blog
Editer l'article Administration Créer mon blog
13 décembre 2010 1 13 /12 /décembre /2010 22:48

I soi pas per res !

 

O disi de tira : ne soi pas responsable ! Al moment de l’afar, la setmana passada, èri endacòm al dessús de l’Atlantic plan al dessús dels nívols e me dobtavi pas de la tragèdia viscuda per unes Parisencs engabiats dins lor veitura en causa de la nèu e del glaç e de l’abséncia dels escaça-nèu e de las salairas. Brice d’Auvèrnhe, lo ministre dels Afars interiors, aviá declarat lo jorn d’avant – seguissent l’avís de sos conselhièrs – que tot anava plan sus las rotas ; lo lendeman, se deguèt desdire e passar per un colhon. Faguèt portar la responsabilitat a Météo France qu’aviá pas previst – çò diguèt – que nevariá autant e que, en consequéncia, lo govèrn aviá pas pogut prene las mesuras apropriadas ; desempuèi Moscòu, F. Fillon lo sostenguèt e portèt las meteissas acusacions. Mas Météo France rebequèt e, en portant la pròva qu’avián plan fach son mestièr, mostrèron que lo ministre mentissiá. L’operacion de « com » es venguda una operacion de con ! Se pòt melhor comprene ara perqué Brice d’Auvèrnhe sosten los policièrs que venon d’èsser condemnats – lo parquet a fach apèl de segur –  per aver mentit fòrt e mòrt dins la relacion e la redaccion de faches qu’avián menat lo « copable » en preson. Los irresponsables, dins aquel cas, son pas los policièrs mas los jutges que prenon lo partit dels raubaires de veitura contra l’òrdre e la securitat dels ciutadans. Los mèdia, que se trufan per exemple d’un Berlusconi e de son biais de cambiar la lei a son avantatge, van pas en contra al ministre que comença pr’aquò d’aver un bona colleccion de « frasòtas » a propaus dels estrangièrs, dels foncionaris e, ara, dels jutges e de la justícia. A una bona excusa ça que la : es pas que lo rebat de la votz de son mèstre, Nicolas Ièr e de sos propauses securitaris…

 

Editorial de La Setmana, n°795

Partager cet article

Repost 0
Andriu de Gavaudan - dans Anar del mond
commenter cet article

commentaires

Presentacion

  • : Le blog de Andriu de Gavaudan
  • Le blog de Andriu de Gavaudan
  • : Actualitat en lenga occitana Lenga e cultura occitanas (occitan ancian e modèrne)
  • Contact

Recèrca