Overblog Suivre ce blog
Editer l'article Administration Créer mon blog
23 mars 2010 2 23 /03 /mars /2010 10:49

L’espèr tà qui ?


Desempuish lo temps qu’ac esperava, qu’es estat entenut. E pr’aquò tots que’u disèvan que n’ac poiré pas har, que las reformas ne’s hasèvan pas contra la volontat deus ciutadans. Los sons amics que muishavan un coratge mendre tà sosténguer ua reforma que los lors electors e consideravan com ua ingeréncia dens la lor vita privada. Los lobbies n’avèvan pas esparnhat ni lo lor temps ni la lor moneda e quand coneishen las còstas tà ua campanha electorau… Caparrut, qu’a tengut bon sus l’essenciau e resistit au descadenament de las passions, avitadas a contunhar per los sons adversaris qui s’èran a l’epòca trufat deu son eslogan de campanha : « Ensems, qu’ac podem har ! » Vertat es que la reforma a tot tà desplàser aus tenguents deu liberalisme descabestrat que considèra que l’Estat n’a pas a’s mesclar deus afars deu autes e a las societats d’asseguranças que ganhan la lor vita sus la santat o la mòrt deus autes. Vertat es tanben que mei d’un ne vesen pas perque e deurén « balhar moneda » a de vauchic o a de monde que ne son pas capables, segon eths, de gavidar los lors afars. Çaquelà, aquera reforma que va perméter a mei de trenta milions de personas d’aver ua cobèrta sociau e medicau e de’s poder har suenhar e tot aquò dens un deus país mei desvolopats deu planeta. E, per un còp, que’s pòt parlar de progrès en parlar de reforma. Mès l’eveniment deu moment n’es pas aqueth, de segur. L’Esquèrra navèra qu’es arribada dab la prima e, se ne’n credem los auguris, lo matin deu gran ser politic que seré pròche. Acabadas las pelejas e la dominacion d’un partit, acabadas las lutas deus egos, l’Esquèrra – solidària (dixit Martine) – qu’es en camin tà conquistar lo poder au nivèu exagonau. E degun tà parlar deu prètz deu peu de la bèstia ?


Editoriau de La Setmana, n°758

Partager cet article

Repost 0
Andriu de Gavaudan - dans Anar del mond
commenter cet article

commentaires

Presentacion

  • : Le blog de Andriu de Gavaudan
  • Le blog de Andriu de Gavaudan
  • : Actualitat en lenga occitana Lenga e cultura occitanas (occitan ancian e modèrne)
  • Contact

Recèrca