Overblog Suivre ce blog
Administration Créer mon blog
11 juillet 2007 3 11 /07 /juillet /2007 20:57
Destimborlats, tots !

Sens voler har deu pisha-fred e tà se’n ténguer a l’anar de la causa politica deu moment, l’Esquèrra, dab la victòria de Nicolas Ièr, qu’a signat per duas mandaturas dens l’oposicion… Lo candidat qu’avèva anonciat la « rompedura » e, deu son punt de vista que l’a hèita ; que hidè pòstes claus a uas hemnas çò qui ahortís la soa diferéncia dab las « juppetas » d’un còp èra – qui estón remplaçadas a las prumèras dificultats deu govèrn Juppé. Tanlèu elegit, que digó aus sons amics qu’èra lo president de tots e que volèva un govèrn de dubertura ; entà hèser aquò, que lancè, dab un succès gran, los sons hilats dens lo camp advèrse e qu’auré l’intencion de contunhar en sosténguer la candidatura de D. Strauss-Kahn au pòste de director deu FMI sens parlar de Vedrine e Lang. La soa faiçon de far n’agrada hèra aus elegits deu son bòrd mès, subertot, que provòca un rambalh deus grans a esquèrra.
Desempuish la soa des·hèita, la « hera de las castanhas » e de las « frasòtas » qu’es dubèrta au Partit socialista e lo Partit comunista que deu formar ua « coalicion tecnica » dab los Verds se vòu aver ua possibilitat de s’exprimir a l’Assemblada nacionau… Los socialistas, tot particularament, que son destimborlats que joguen demest los « elefants » o los « leons » cars a Montebourg ! DSK e Fabius que venon de renonciar au lor sèti deu burèu nacionau e S. Royal que hè assaber qu’es mei utila au defòra qu’au deguens. Ne i a pas sonque F. Hollande tà har responsa en emplegar ua lenga de husta. La vampirizacion entrepresa per Nicolas Ièr qu’empacha lo P.S. quitament de pensar a ua possibilitat de renovacion, destimborlats que son tots e ne son pas las lors lutas intestinas qui van ajudar… Ives Cochet demanda la dissolucion deus Verds avant renovacion. Quid deus socialistas ?

Andriu de Gavaudan
Editoriau dins La Setmana n°620
Repost 0
Andriu de Gavaudan - dans Anar del mond
commenter cet article
5 juillet 2007 4 05 /07 /juillet /2007 14:52
Divendres, 5 de julhet

Aimaraiái d'escriure mai sovent mas,  per aquò far, cal una disciplina de fèrre ; e l'ai pas ! Son pas las causas que manca pr'aquò mas, dins la vida vidanta, l'interès me pareis un pauc redusit e, per çò que tòca la Societat – amb una S granda –, òm se demanda coma podèm avançar talament i a de temps qu'anam cuol per dessús tèsta.
La politica, primièr, pr'amor ràdio e tele quitan pas de nos parlar de oautres e encara de nosautres e encara de… Enfin pas exactament, parlan de Sarkozy qu'es nòstre president elegit ; mas coma Sarkozy nos representa se ne cresèm los tèxtes, sèm nosautres a passar a la telé o sus las ràdios – sens parlar de la premsa escricha – vint còps per jorn;
Sèm encara nosautres a dire que, gràcias al volontarisme qu'avèm mostrat, Euròpa es tornada partir per un avenidor gloriós ; e los qu'an qualque dobte serián melhor inspirats de seguir lo guida !
Podon pas dire que Sarkozy se bolèga pas ; es d'en pertot ! O fa tot, o règla tot ; daissa pas sos ministres polsar…
E, amb sa politica de dubertura cap a una oposicion que se manja lo morre, capita al delà de tota esperança… L'Esquèrra sap pas mai ont penja lo lum ! Los comunistas se comptan e fan lors comptes, los Vèrds per existir a la Cambra fan aliança mab los comunistas e, en defòra,  quitan pas de se carcanhar per saber qual es lo qu'aurà rason a la tota fin ; los socialistas, pecaire los socialistas ! sabon pas se lor cal rire o plorar; E del pas que son partits, n'an al mens per doas  mandaturas – es a dire 10 ans – avant d'arribar a se reviscolar. Son de monde qu'an perduts lors illusions e lors certituds e avant que las tornèssen trobar d'aiga passarà jols ponts de Garona !
Repost 0
Andriu de Gavaudan - dans Anar del mond
commenter cet article
4 juillet 2007 3 04 /07 /juillet /2007 20:54
Renècs e injúrias…

« Percaçarem los terroristas dins los quites cagadors ! » diguèt Pútin, president de Russia, qualques ans a, dins una conferéncia de premsa en parlant dels Chechèns en luta contra Mòsco. Qu’un president parlèsse aital aviá soslevat una reprobacion quasi-unanima… Dins un autre registre, al cors d’un rescontre europenc dels caps d’Estat, Chirac, atissat per Thatcher – que voliá que li tornèssen sa moneda – èra estat susprés, en causa d’un micro demorat dubèrt, en tren de far de remarcas desagradivas que sos « joièls de familha » i tenián una plaça ! Reprobacion aquí tanben. La brutalitat eslava del primièr e la gallesariá del segond èran estats mes en avant. Vertat es que, dins aquel mitan de la diplomacia, quand se parla de « discutidas francas » aquò vòl dire que son estadas per lo mens animadas !
Dins la vida vidanta, renècs, injúrias e remarcas desagradivas mancan pas e, en país d’òc, son generalament acompanhadas de gèsts – per se fa melhor compréner ? Fins a un periòde recent, me sembla que podiam renegar o emplegar mots o images despreciatius mai liurament qu’endacòm mai dins l’exagòn sens s’ameritar infèrn e damnacion. Mas los periòdes càmbian e lo brassatge de las populacions fa que las paraulassas, los « mots grossièrs » son pas mai acceptats dins una societat de mai en mai aseptizada. Pr’aquò, per damnejar o per injuriar qualqu’un se cal trobar dins una situacion particulara que lo president de l’UMP se i trobava pas quand exprimiguèt, la setmana passada, son opinion sus A.-M. Comparini amb una equipa de television a son costat. Lo monde politic poirián benlèu soscar al dialoguista M. Audiard que fa dire a un personatge de film : « Los cons an paur de res ! Es pr’amor d’aquò que se pòdon reconéisser. »

Andriu de Gavaudan
Editorial de La Setmana n°618
Repost 0
Andriu de Gavaudan - dans Anar del mond
commenter cet article
30 juin 2007 6 30 /06 /juin /2007 15:47
Rompedura, refondacion…

Viscosse enqüèra, Napoleon, l’estratèg deus nòstes libes d’Istòria, que seré gelós de Nicolas Ièr que hasó au hissa-cuu pendent lo Conselh europenc de Brussèlas ; tà assajar de véner (!) lo son « tractat simplificat » qu’anè de Blair (G.B.) aus bessons Kaczynski (P.) en passar per Zapatero (E.) o aute Junker (L.). E n’esitè pas de díser aus mèdias que « en un mes e miei [s’èra] passat mei de causas que non pas en dus ans ». E d’ajustar : « Ua setmana atau que compta dens la vita d’un president ». La rompedura qu’es en camin e los laus – au mens en cò nòste – que son au rendetz-vos quitament a esquèrra dab un Jack Lang totjorn prèste a reconéisher los meritis deus autes (!). Taus mèdias alemans totun, qu’es gràcias a la tenacitat de la cancelèra, Angela Merkel, se un acòrd a minima es estat possible…
A esquèrra, l’òra qu’es a la « refondacion ». Los Verds e los comunistas, cadun deu son costat, qu’ac vòlen reformar tot, « sens tabó » (M.-G. Buffet) mentre que  los socialistas que son en cèrca d’« un gran partit de l’esquèrra ». Lo recent conselh nacionau deu PS que vedó lo succès d’una sintèsi que Hollande n’a lo segret e que’s podó ausir las asenadas abituaus de Melenchon : « Qu’em aciu tà empachar ua temptativa de golpe » e la lenga de husta deus ierarcas qui deamandan de « jogar collectiu » dab las objurgacions d’un P. Mauroy disent que « lo PS qu’es ua grana organizacion qui ne pòt pas estar presa per fòrça ». La Ségolène qui se viu de mei en mei en Joana d’Arc qu’avèva mei aimat demorat en Peitau dab las « gents vertadièras », benlèu tà s’entrainar a guarir las escròlas, qui sap ! Tant que hàcian atau, ne cromparàn pas nada bòrda mès, après tot, lo qui ne sap pas nadar n’es pasz obligat de getar dens l’aiga…

Andriu de Gavaudan
editoriau de La Setmana n° 618

Repost 0
Andriu de Gavaudan - dans Anar del mond
commenter cet article
29 juin 2007 5 29 /06 /juin /2007 20:34
Coneissi aquesta cançon desempuèi un brave briu e me soi amusat a la revirar en occitan lengadocian e en occitan gascon. Segur, la revirada pòt èsser melhorada e sètz los plan venguts de o far e de me o far saber.

Propos d’un galant homme

Sexe charmant à qui l'on fait
Ce qu'il est si joli de faire,
Je voudrais vous avoir au fait
Pour vous montrer mon savoir faire ;
Car avec vous quand on le fait
On a tant de plaisir à le faire
Qu'on voudrait ne pas l'avoir fait
Pour pouvoir encore vous le faire.

Quand trop souvent on vous le fait
Bientôt on ne peut plus le faire ;
Vous avez sur nous dans le fait
L'avantage de toujours faire.
Mais, comme sans nous dans le fait,
Belle, vous ne pouvez rien faire,
Afin que cela soit bien fait
Ne vous le faites pas trop faire.

L'époux qui jamais ne le fait
A sa femme défend de faire ;
Mais si l'épouse aime le fait
L'époux a beau dire et beau faire,
Dût-il la prendre sur le fait
Elle trouve le moyen de faire
De sorte que l'époux est fait
Pour n'avoir pas voulu le faire.

Mais c'est assez parler du fait,
Belle, devant vous sans le faire ;
Vous me croiriez peut-être fait
Pour n'en parler et n’en rien faire.
Sans plus tarder, venons au fait
Et vous verrez, me sentant faire,
Que si je parle bien du fait
Je sais encore bien mieux le faire.


Occitan lengadocian

Prepaus d’un òme galant

Sèxe polit al qual es fach
Çò qu’es tan polit de faire
Aimariái vos aver al fach
Per vos mostrar mon saber faire
Car amb vos cada còp qu’es fach
Avèm tant de plaser a o faire
Qu’aimariam o aver pas fach
Per poder encar’ vos o faire

Quand tròp sovent a vos es fach
Lèu lèu o podèm pas mai faire
Avètz sus nosautres dins lo fach
L’avantatge de totjorn faire
Mas coma sens nos dins lo fach
Bèla, ja podètz pas ren faire
Per fin qu’aquò siá plan fach
Vos o fasètz pas tròp faire.

Quand per l’espós es jamai fach
A la femna defend de faire
Mas se l’esposa aima lo fach
L’espós poirà plan dire e faire
La prenguèsse quitament sul fach
Tròba lo mejan de far
De sòrta que l’espós es fach
Per o aver pas volgut faire.

Mas es pro parlat del fach
Bèla devant vos sens o faire
Me poiriatz creire benlèu fach
Per ne parlar e pas res faire
Sens mai trigar venèm al fach
E veiretz me sentent faire
Que se parli plan del fach
O sabi encara melhor faire

Occitan gascon

Perpaus d’un òme galant

Sèxe beròi au quau es hèit
Çò qu’es tan beròi de hèser
Qu’aimarí de vs’aver au hèit
Tà vs’amuishar mon saber hèser
Car dab vos cada còp qu’es hèit
Qu’avem tant de plaser d’ac hèser
Qu’aimarem n’ac aver pas hèit
Tà vs’ac poder enqüèra hèser

Quan tròp sovent a vos es hèit
Lèu lèu n’ac podem pas mei hèser
Qu’atz sus nosauts tots dens lo hèit
L’avantatge de totjorn hèser
Mès com sens nosauts dens lo hèit
Bèra, ne podetz pas arren hèser
Entà qu’aquò sia plan hèit
Ne vs’ac hètz pas tròp sovent hèser

Quan per l’espós es jamei hèit
A la hemna que defen d’ac hèser
Mès si la hemna aima lo hèit
L’espós que poirà plan díser e hèser
La prengosse per cas suu hèit
Que tròba lo mejan d’ac hèser
De sòrta que l’espós es hèit
De n’ac aver pas volut hèser

Mès qu’es pro parlat ara deu hèit
Bèra devant vos sens ac hèser
Que’m poiretz créder benlèu hèit
Tà ne’n parlar e arren hèser
Sens mei trigar venem au hèit
E que veiretz me sentint hèser
Que se parli plan deu hèit
Qu'ac sabi enqüèra melhor hèser
Repost 0
Andriu de Gavaudan - dans Cançons
commenter cet article
25 juin 2007 1 25 /06 /juin /2007 16:59
La setmana  passada, anèri  sus Tolosa per veire çò qu'èra aquel Festival des mots qu'un amic m'aviá invitat per escotar los mots angleses… Perqué pas ?  Son pas las animacions que mancavan mas i èri davalat pas que  escotar un pauc d'anglés.
Lo dissabte de matin, vegèrem a la Bibliotèca dels Minimes – òsca a la bibliotecària e a son equipa ! –, l'escrivan David Lodge plan conegut dins l'exagòn ; aparentament, son reviraire es bon se me fisi al sol libre qu'ai legit d'el en francés ; los autres, los ai legit dins la lenga de l'autor… Los escambis lingüistics servisson a còps !
I aviá un molon de monde ; urosament qu'èram arrivats en avança ! pasmens, passèrem un moment fòrça agradiu quitament se, a cada còp, la revirada li copava lo fiu… Mas que volètz, tot lo monde capita pas de comprendre la lenga de Shakespeare que pr'aquò totas las publicitats presentan coma aisida… Foguèt una intervencion de nauta tenguda e me regalèri…
Doas causòtas sonque ; David Lodge nos diguèt que legissiá pas cap d'autors franceses e aprenguèri que foguèt fach Chevalier dins l'Ordre des arts et lettres. Ieu pensavi qu'èra per qualqu'un que, dins son òbra o sa vida, fasiá la promocion de la lenga e de la cultura francesa… El, ne sap pas un mot e pensi pas qu'aquò l'interessa quitament de bretonejar. Diguèron que la sia femna parlava francés ; es benlèu pr'amor d'aquò !
L'après-miègjorn, i aviá Jane Birkin e Charlotte Rampling qu'èran programadas per legir poèmas de Willima Blake (sègle XVIIen-
XVIIIen). E ben, monde, foguèrem pas decebuts del viatge !
La granda sala del TNT èra comola mas la majoritat de las gents èran aquí sonque per veire la Birkin e la Rampling en « carn e en òsses ». Es quicòm qu'avèm pas en província : d'artistas nacionalas o internacionalas que se passejan per carrièras !
Per las veire, las avèm vistas mas ieu – deviam èsser una minoritat – èri vengut per escotar de poèmas legits en anglés per de professionalas… Paure de ieu ! Foguèt una vergonha. Agèrem un « espectacle » d'una mièja ora per de monde que, manifestament, avián pas preparat res ; cercavan lors papièrs e las reviradas « espontanèas » de la Birkin èran en complet descalatge amb lo tèxte anglés… Quan pensi que paguèrem dètz euros…
Marida causida o artistas que se permeton de far en província çò que gausarián pas jamai faire a la capitala.
M'an dich pr'aquò que totas las intervencions èran pas autan marridas qu'aquela.
Quitament se lo Festival des mots es una manifestacion « parisenca » amb de monde de París se son dubèrts ongan al monde occitan e a nòstra lenga mas ai pas vist res ; serà per un autre còp…
Repost 0
Andriu de Gavaudan - dans Anar del mond
commenter cet article
23 juin 2007 6 23 /06 /juin /2007 22:27
Una setmana s'acaba e, vertadièrament, i a pas grand causa de novèl… ò, de novèl n'i a pr'aquò, mès subretot per nòstre president de la Repulbica que me demandi consí va poder contunhar aital de se voler trobar al forn e al molin, en tren de sonar las campanas e de seguir la procession…
S'es quitament pas pausat desempuèi qu'es estat elegit president ; a pas arrestat de córrer ! De se demandar perque a pres de ministres dins son govèrnament estant que fa tot, e subretot las questions e las responsas. Lo primièr ministre, F. Fillon sembla pas de se plànger e los ministres tanpauc.
Enfin, la noveltat es que s'es petaçat per clavar lo bèc a l'Esquèrra en prenent de ministres o de secretaris d'Estat estampilhats a esquèrra. Sabi plan que los ierarcas del partit socialista o del partit comunista dison qu'es pas qu'un efièch d'anóncia e qu'aquò durarà pas ; se pòt, mès tròbi qu'es una vergonha per l'Esquèrra d'aver pas sabut promòure de gents aital que n'an agut lor confle d'esperar lo matin del grand ser al dintre del partit socialista…
La dubèrtura es pas estada del gost de totes, subretot a l'UMP e la reflexion de Devedjian, que faguèt lo mes passat, qu'èra per la dubertura « fins als sarkosistas ! » es partejada per mantuns elegits… Sufís d'aver entendut una elegida d'Alsàcia que disiá l'autre ièr que compreniá pas consí se fasiá que los traites èran recompensats alara que los amics semblavan pas comptar…
Sabon pas tot aquel monde que Nicolas Ièr a legit los evangèlis avant son eleccion e que i a trobat que « los primièrs seràn los darrièrs e los darrièrs seràn los primièrs ».
Lo president o a dich : « Soi lo president de totes ! » Durarà çò que durarà e ceirem aquò quand lo cèl comencarà de s'ennivolar…
Al defòra, Nicolas Ièr se crei lo Napoleon del sègle XXIen e, al rescontre que s'acabèt ièr, anèt de l'un a l'uatre dels caps d'Estat per vendre sa solucion… Lo doctor miracle es el e… o sabián pas !
Enfin, pareis qu'en fin de serada un acòrd foguèt trobat per tornar metre Euròpa sul camin.
Ailàs, aqueste dimenge matin, se la premsa alemanda lausenja lo trabalh constructiu e pacient de la cancelièra, Angela Merkel, a pas un mot per nòstre estratègi exagonal.
Benlèu que la premsa a pas aimat de veire Nicolas potonejar lor cancelièra !
Repost 0
Andriu de Gavaudan - dans Anar del mond
commenter cet article
20 juin 2007 3 20 /06 /juin /2007 16:31
Digatz, digatz, quinas novèlas…

« Arunan, èram al bòrd del precipici ; ongan, avèm fach un grand pas en avant ! » Atribuïda a Anouar el Sadate, aquela frasa poiriá s’aplicar als protagonistas de l’Orient pròche : Palestinians e Israëlians, e los que los sostengon… L’evolucion de la situacion al cors dels darrièrs jorns pòt daissar crentar lo pièger. Los Israëlians an doas Palestinas per lo prètz d’una (!) : Cisjordania ont un Fatah – partit del president de l’Autoritat palestiniana,  Mahmoud Abbas – corromput baileja lo territòri e Gaza que lo Hamas – arribat regularament al poder l’an passat dins tota la Palestina –, sostengut per grops integristas e sustot per l’estat sacamand qu’es Iran ven de se’n rendre mèstre. Israël que dempuèi annadas refusa las diferentas resolucions de l’ONU e que mena una politica irrealista cap als Palestinians se tròba cada jorn un pauc mai en dangièr. De daissar d’ocupar Gaza e de bastir un mur entre Cisjordania e Israël a quitament pas aportat una seguretat melhora als estatjants ; au sens contra, aquela politica a noirit un ressentiment en cò dels Palestinians de Cisjordania pr’amor de las expropriacions e de las situacions ubuescas dins las qualas se tròban mantuns vilatges. Empedegats que son dins lo fangàs iraquian al nom de la « crosada » contra las fòrças del Mal, los Estats-Units an daissat córrer tot en sostenent los Israëlians dins lor poltica. L’Union europèa – que, dempuèi lo referendum, li demòra pas que l’Euròpa geografica en comun – es pas estada capabla de menar una reflexion collectiva per prepausar unas solucions.
En cò nòstre, urosament, tot va plan ; la drecha majoritària va poder aplicar son programa e l’esquèrra, tota suspresa d’aver contengut lo « mal blau », va poder tornar a sas garrolhas elefantescas…

Andriu de Gavaudan
Editorial de La Setmana no 617
Repost 0
Andriu de Gavaudan - dans Anar del mond
commenter cet article
19 juin 2007 2 19 /06 /juin /2007 14:28
Es partit per un torn…

Encara un pauc de paciéncia  e saupretz qual es l’elegit de vòstre còr – o del còr del vesin ! – que, pendent cinc ans vos representarà a la vila granda de París. Pensatz benlèu que, dins aqueste cas precís, la causa a pas una importància màger estant que lo califa Nicolas Ièr a capitat de convéncer una granda majoritat de franceses qu’èra lo sol recors per nòstres problèmas e que se totes los deputats èran de son bòrd, la mitat de problèmas serián resolguts.
Lo monde devián n’aver son confle pr’amor que sembla, d’après las gasetas e… los sondatges qu’aquesta embrolha va marchar. Se fòrcas gents que vivon dins la precaritat an soscrivut al programa del califa novèl es que son estats tocats per un discors binari dels tèrmes simples e l’eslogan « Trabalhar mai per ganhar mai ! » a fach flòri en cò de perosnas qu’aimarián èsser un pauc mai amonedadas. Es normal tanben que, en seguida de l’accession de Nicolas Ièr al tròne del Sublim Castèl Elisèu, contunhan de favorizar lo meteis en votant per un de sos zelots. D’aver ligat eleccions presidenciala e legislativas podiá pas portar un resultat diferent e seriá estat tot parièr se la Ségolène, lo prègadieu, foguèsse estada elegida.
Ai dejà dich que l’esquèrra èra tota ensucada e son pas los arguments ninòis dels uns e dels autres que cambiaràn lo resultat d’aqueste segond torn. Li demorarà pas qu’a se tornar metre en question – en questions, seriá melhor pr’amor ne va i aver de questions… Perqué aver diassat a la drecha l’onor de nomenar personas gessidas de l’immigracion ? Perqué aver pas remés en question la multiplicitat de mandats ? Perqué ? Perqué ? L’esquèrra sembla d’aimar los far-valer sus las listas mas tanlèu que s’agís de se retirar per promòure de novèls venguts, cocanha… i a pas mai degun !
O sabi que la drecha es merssorguièra autan e benlèu mai que l’esquèrra mas qu’a sabut enviar signes a una populacion un pauc desbossolada e qu’a pagat !
Joan que ritz e Joan que plora serà per aqueste diluns mas la vida contunha e qual que siá nòstre deputat, nos cal pas lo daissar tranquil fins a la fin de son mandat. Li cal demandar de comptes, l’interpelar coma dison dins la premsa se o cal al lòc de plorar o de repotegar entre nosautres. França es a tornar bastir e Euròpa es a far… Donc regussem nos los margues e al trabalh !

Andriu de Gavaudan
Cronica occitana
pareguda dins Le Petit Bleu
de dimenge 17 de mai de 2007
Repost 0
Andriu de Gavaudan - dans Anar del mond
commenter cet article
14 juin 2007 4 14 /06 /juin /2007 19:46
La desbandada…

Entà amuishar tota la soa satisfaccion, Nicolas Ièr, lo califa navèth que deu esperar enqüèra quauques jorns ; lo son vizir totun n’es pas autan vergonhós qui se regaudeish de l’acuèlh hèit peu pòble a las ambicions deu son mèste e qui se trufa sens relambi d’un adversari des·hèit suu camp batalhèr e dens l’impossibilitat de recampar las soas fòrças tà esparnhar ua desbandada umilianta… Lo vizir, doble en negatiu deu califa, que sap que los sons prepaus e son partejats per ua majoritat de gens qui son estats decebuts de véder que las lors dolenças n’èran pas jamei – o guaireben – presas en consideracion per un poder qui se disèva pròche d’eras e de las lors preocupacions. Lo califa navèth que deuré arremerciar Giscard, un deus sons davancèrs, tà l’adopcion deu quinquenat e Jospin – qui se pensava d’estar au segond torn ! – qu’insistí tà cambiar l’òrde de las eleccions presidenciau e legislativas. A esquèrra, praube ! qu’es la desolacion de la desolacion… Ensucats com ac son, ne pòden quitament pas trobar los mots qui poirén balhar aus electors ua rason valadera tà assajar de sauvar çò que demorarà de pluralitat de la reperesentacion nacionau ! Lo Bearnés n’a pas capitat lo soa escomesa mès las soas ideas qu’an trobat un reclam en çò de Nicolas Ièr qui a sabut amistosar quauques líders « enemics » en disgràcia dens lo lor camp en lor balhar cargas o sinecuras ; en òme qu’a hèit de la traïson un mestièr, que sap com se ganha la reconeishença… L’ofensiva ne s’acabarà pas aqueste dimenge deu segond torn e l’esquèrra que’s deu preparar a la sopa populara pendent un periòde long a mens que de la des·hèita sàpia har un remèdi tà se tornar reviscolar. Que seré temps qu’ignorèsse pas mei lo principi de realitat…

Andriu de Gavaudan
editoriau de La Setmana n°616
Repost 0
Andriu de Gavaudan - dans Anar del mond
commenter cet article

Presentacion

  • : Le blog de Andriu de Gavaudan
  • Le blog de Andriu de Gavaudan
  • : Actualitat en lenga occitana Lenga e cultura occitanas (occitan ancian e modèrne)
  • Contact

Recèrca