Overblog Suivre ce blog
Administration Créer mon blog
25 juillet 2017 2 25 /07 /juillet /2017 23:43

« I’m happy ! »

 

Dimenge en serada, totas las canaus televisuaus que se la hasón a la Droopy, lo can creat per Tex Avery : « Be sabetz qué ? Que soi urós ! Jornalistas, politicians, enfin tots los que s’exprimivan suu fenestron que te hasèvan un morre long com un nas d’un pam quitament s’èran demest los elegits. Com ac ditz la cançon : «  S’[èran] tombats per tèrra, qu’[èra] la fauta a Voltaire… » Ne i avèva pas sonque los que s’èran mes En Marche ! entà gausar sorríser un chic mès pas tròp que avèvan devut recéber la consigna de non pas har deus fièrs. Coma a cada còp, totun, las declaracions deus líders qu’èran sens suspresa. La Marine que’s felicitava d’aver forçada la pòrta del Parlament a maugrat de totas las trapèlas deus enemics deu pòble e deu complòt generalizat de l’UMPS desempuish tan d’annadas. Lo Jean-luc, elegit peu prumèr còp suu son nom – e non pas gràcias a un escrutinh de lista (elecions europèas) o indirècte (eleccions senatoriaus) – que’s presentava com l’opausant unic a un poder gaireben illegitim en causa de l’abstencion massiva deus electors. Los representants de l’UMP que’s revindicavan lo prumèr partit d’oposicion quitament s’èran conscients d’estar estar estrilhats… Ne doblidèn pas çaquelà, per la votz de V. Pécresse al mens, de senhalar  qu’aquera eleccion èra un panatòri e que lo cambiament, e serén eths que l’aurén devut miar en aplicar lor programa ! La rotina, qué ! Damb tots aqueths comentaris, ne cau pas s’estonar que lo monde estiman mèi de demorar a l’ostau ! Alavetz, un còp de mèi per arren ? Que non pas ! Tot prumèr, 75 % deus deputats que van passar lo solhar deu Parlament peu prumèr còp ; en segond, las hemnas ne son pas jamei estadas autan nombrosas. Que ns’an dit que las hemnas e hèn politica d’ua faiçon diferentas ; que veiram se lo lor nombre e’us permetrà d’ac amuishar… Peu moment, que hasem com Droopy : gaujor retenguda !

 

Andriu de Gavaudan

Editorial de La Setmana, n° 1079

Repost 0
Andriu de Gavaudan - dans Anar del mond
commenter cet article
25 juillet 2017 2 25 /07 /juillet /2017 23:38

Lo gloriós e lo rusat !

 

O dirai pas jamai pro mas trobar causas intelligentas a vos contar cada setmana es pas totjorn aisit.

O sabi, son pas los eveniments que mancan a l’ostal coma al defòra, dins lo país coma a l’estrangièr… Per malastre, l’estiu, çò que compta per las gents e pels mèdia es lo solelh. Lo solelh amb sos corrolaris que son lo Torn de França, la corsa mai bèla del monde !, las plajas que son las plajas mai polidas del planeta, etc.

Cadun o sap : los Franceses son totjorn estats modèstes e es pas amb lo president novèl qu’aquò cambiarà. Lo jorn que nòstres representants seràn modèstes, ò, pas tròp mas sonque un pauc, los mèdia ne deurián parlar a léser…

A, los Franceses ! A, França ! Sèm aquí a voler far la leiçon a totes los autres mas jamai fariam un pauc d’introspeccion per aprene a relativizar.

Es  pas que volèm pas mas o sabèm pas far. Un grand país coma lo nòstre n’a pas l’us del mot « instrospeccion » per se mas lo coneis pels autres. Agachatz un pauc los Estatsunidencs qu’un president imprevisible lor es tombat sul nas. Nautres, avèm  pas de mots pro fòrts per los jutjar aqueles Estatsunidencs. Nòstre president que vòl èsser a l’auçada dels Estats Units fa tot çò que pòt per s’amistosar oficialament amb un òme que sap quitament pas ont França se tròba geograficament e que s’imagina èstre galant quand es pas que grossièr !

Enfin, nòstre president a volgut mostrar a totes qu’el sabiá far la distinccion entre los diferents politics o los punts de doctrina e la bona educacion.

L’a jogada fina l’invitacion de Trump a París pel quatòrze de julhet. O sabiá que, malgrat qu’agèsse renegat l’acòrd sul clima en causa de son ignorància e dels « lobbies » de l’òli que son gaireben totes dins son govdernament, resistariá pas al  plaser d’èsser vist de totes suls Camps elisèus, filmats per las camèra del monde entièr… Trump es totjorn content quand òm parla d’el e de sa fema qu’es un quarantenat d’annadas mai  jove.

Nòstre president, el, vòl restaurar la monarquia republicana instaurada al començament de la Cinquena Republica per Ch. De Gaulle e, coma l’oposicion existís pas mai, se pòt far plaser…

E ieu, dins mon luòc de recuperacion per personas qu’an agut qualques problèas de santant, pòdi « introspectar » a mon léser…

 

Andriu de Gavaudan

Cronica occitana, Le Petit Bleu de Lot-et-Garonne, 16 de julhet de 2017

Repost 0
Andriu de Gavaudan - dans Anar del mond
commenter cet article
17 juin 2017 6 17 /06 /juin /2017 17:19

Me’n diretz tant !

O dirai pas jamai pro mas, çaquelà, n’i a que cèrcan las embrolhas !

Me calriá de segur tornar parlar del president estatsunidenc que quita pas de far sos bresolhadisses =tweet] sus son telefonet per demorar en contacte dirècte amb los Estatsunidencs que l’an elegit. Los quites servicis segrets, aparentament, an pas pogut lo far cambiar d’avís sus aquel sicut. Lo president Obama, el, s’èra plangut d’aqueles interdiccions mas s’èra plegat a las directivas d’aquel mond que son encargats de la seguretat del president…

Mas coma se vòl un president atipic e, coma considèra gaireben totes los mèdia coma de messorguièrs, estima que li demòra pas qu’aquela faiçon de comunicar… Pòt aital far partejar sos sentiments, sas opinions e los famoses faches alternatius que n’es un afiscat…

E puèi avèm la primièra ministra del Reialme Unit que ven de se tirar una bala dins lo pè en organizant d’eleccions legislativas per aver, çò pensava, una majoritat confortabla pendent las negociacions amb l’Union europèa que quitèron l’an passat. En bona Anglesa (e pas Britanica), volriá aver lo burre, l’argent del burre e lo ssorrire de la cremièra… Naturalament pels Europèus son figas d’un autre panièr e o an fach assaber.

Las negociacions devián començar la setmana que ven mas degun sap pas çò que ne virarà. Lo temps pressa que, dens dos ans, tot deuriá èsser acabat, al mens dins las grandas linhas.

E puèi, i a nosautres, lo mond de l’exagòn… Venèm d’elegir un president jovenòt qu’a pas jamai agut de mandat electiu, que siá local o nacional, e qu’a capitat una campanha electorala sens aver un partit estructurat « a l’anciana » per lo sosténer ; amb, coma consequéncias collateralas, la desbranda dels dos partits de govenrnament tradicionals.

Aqueste ser, en principi aurem una idèa de la representacion nacionala a venir. Mas benlèu es lo primièr còp dempuèi la naissença de la Cinquena Republica que los electors auràn qualque dificultat per causir lo candidat que vòlon veire al segond torn… estant lo nombre de candidats per circonscripcions !

Las causas seràn mai aisidas lo dimenge que ven !

 

Andriu de Gavaudan

Cronica occitana, Le Petit Bleu de Lot-et-Garonne, dimenge  lo 11 de junh de 2017

Repost 0
17 juin 2017 6 17 /06 /juin /2017 17:15

Lo pièger es a nòstra portada…

Los mèdia n’èran encara a analizar las motivacions e las consequéncias de la decision del president estatsunidenc de tirar son país de l’acòrd sul clima (COP21) conclutz gaireben per totas las nacions del planeta quand d’arlèris, en manca d’imaginacion, faguèron lor chaple a Londres, la setmana passada…

Es lo tresen còp, en pauc de temps, que los Angleses son lo teatre d’aqueles assasinats « artesanals » made at home coma d’autres parlan de made in Great Britain ! Es aquí una de las victòrias del movement que se ditz Estat islamic.

En dificultat en Orient Pròche dins sa guèrra contra la coalicion dels païses occidentals e autres « mescresents » de tota mena, quitament musulmans, a capitat de mobilizar de monde, e pas unicament dins los païses occidentals, per semenar la paur e lo desrei al nom d’un dieu, pres en ostatge per de « profètas » autoproclamats qu’an decidit que deviá èsser un dieu venjatiu per punir de mòrt gaireben totes los qu’èran pas de lor vejaire.

Los païses europèus, e l’America del Nòrd tanben, començan de se rendre compte que los discorses sul « viure-ensemble », los « acomodaments rasonables », l’interdiccion de tal o tal comportament « religiós » din una republica « laïca », etc. an pas cap d’efècte sus de personas o sus de grops que se meton o se son metuts en marge d’una faiçon volontària o pas.

Los decideires an pensat benlèu, al cors d’aquelas recentas annadas, que totes se convertirián a la dòxa modèrna : lo vedèl d’aur ! en cridant « Dieu es mòrt ! » An pas vist o volgut veire que losqu’èran pas de comptar, los laissats pel compte, una beluga seriá pro per que se descadenèsson… Los que menan l’Estat islamic o autras sucursalas del crimi e de l’orror l’an plan comprés e expleitat. Lo president estatsunidenc pensa d’aver la responsa : d’armas per totes e de bombas !

 

Andriu de Gavaudan

Edotorial, La Setmana, n° 1078

Repost 0
Andriu de Gavaudan - dans Anar del mond
commenter cet article
17 juin 2017 6 17 /06 /juin /2017 17:10

Un hamburger e son còca-còla en visita…

O dirai pas jamai pro mas podèm pas que constatar que lo planeta sembla virar de mai en mai viste, çò qu’es aus de segur !

Lo president estatsunidenc a daissat pendent una setmana lo país per rescontrar los caps d’Estat europèus e, oficialament, escambiar punts de vista.

Lo problèma es que, amb son ambicion de tornar « America great again », balha l’impression de daissar pas tròp de plaça al diaòg… Dins sa campanha electorala, son intencion èra d’obtenir dels païses europèus que paguèsson mai per s’assegurar la proteccion de las armas estatsunidencas.

En mai d’aquò, quitament se sembla aver cambiat d’idèa, disiá que l’OTAN servissiá pas a grand causa dins la mesura que la patz regnav en Euròpa desempuèi la segonda guèrra mondiala. Disiá tanben fòrça ben del president rus e refusava de veire dins la politica russa una politica d’egemonia e de la manièra fòrta.

Sul clima, musica identica d’après Mossur Trump ! Lo rescalfament climatic es pas qu’una asenada, propagada pels enemics dels Estats Units per los empachar de se desvolopar ; tanlèu que seriá al poder, fariá tot per se sortir de totas aquelas constrenchas signadas per son « catastrofic » predecessor.

Lo Trump es un batalejaire e un bracejaire de primièra e sas decisions, fins ara, sul plan autan interior coma l’exterior fan mai pensar a capricis qu’a decisions perpensadas.

E es vertat que los Europèus sabon pas sus qual pè dançar amb el. Los païses petits generalament seguisson lo corrent mas es diferent amb los païses mai importants politicament. La Merkel, dempuèi totas aquelas annadas al poder en Alemanha a pas l’intencion d’acceptar totes los capricis d’e l’Estatsunidenc ; França amb un president novèl e Itàlia tanpauc. Anglatèrra, ela, a decidit de tirar camin tota sola mas espèra que los ligams istorics amb çò que foguèt autres còps una colonia demoraràn especifics.

Lo Trump a clamat e proclamat que voliá èsser l’elefant dins una magazin de porcelana e los Europèus aimariá d’èsser considerats coma quicòm mai que de la porcelana brigalhada…

Andriu de Gavaudan

Cronica occitana, Le Petit Bleu de Lot-et-Garonne, lo 28 de mai de 2017

Repost 0
Andriu de Gavaudan - dans Anar del mond
commenter cet article
23 mai 2017 2 23 /05 /mai /2017 23:38

La geografia e lo president…

Lo president estatsunidenc qu’es un adèpte deus bresilhadís – tweet en francés – suu son telefonet intelligent – smartphone en francés – entà har conéisher aus sos amics electoraus e au planeta las vilanias deus sons enemics a son encontra e çò qu’a hèit desempuish la soa eleccion tà tornar har « America great again » après la politica catastrofica deu son predecessor.

Benlèu que considèra aquesta setmana cargada enter l’Orient pròche, Brussèlas e Itàlia com ua pausa salutària e mei reconfortanta que totas aqueras misèrias que’u hèn at home !

Se ne credi los confrairs qui segueishen los tribulòcis d’aqueth president imprevisible, tot que pòt arribar quitament lo melhor ! La soa doctrina qu’es com eth : primària ! E la soa dòxa qu’es simpla : los drets de l’Òme, ne coneishi pas ; los afars, que coneishi. La mission civilizadora dels Estats Units, quan n’an ua, que’s limita per eth a : « La vòsta moneda que m’interessa » mentre que un Obama e assajava de har passar « messatges ».

Lo metòde brutau deu president actuau que pòt embelinar los dirigents de las dictaduras miei-orientaus qui n’aiman pas de’s véder reprochar assassinats, suplicis de la còrda e autas lapidacions. A mens que las soas paraulas ne sian pas que batalejadas mès, dens aqueste cas, qu’arroïnarén un pauc mei lo crèdit qui’u demòra.

Dab la part europèa deu son viatge, que seràn higas d’un aute tistèth e, qui ac sap, ua ajuda involontària entaus país qui aima rén d’avançar cap a ua integracion mei hòrta se, per cas, decideish de baishar d’ua faiçon significativa la participacion financièra a l’OTAN deus Estats-Units.

Ne cau pas doblidar tanpauc l’entervista damb lo papa Francés qui, maugrat qu’aja pas nada division (militara), coma ac disèva Estalin, a ua influéncia de las granas gràcia au son magistèri. E, de segur, Francés ne mancarà pas de’u parlar de l’immigracion e de la situacion desesperada de milions d’Estatsunidencs privats de l’Obama care…

Trump tocat per la gràcia, se pòt ?

Andriu de Gavaudan

Editoriau de La Setmana, n°1077

Repost 0
Andriu de Gavaudan - dans Anar del mond
commenter cet article
16 mai 2017 2 16 /05 /mai /2017 19:56

Los quatre tèrces…

 

Dura lex sed lex… Dels quatre arribats primièrs « dins un mocador », la lei causís los dos primièrs per n’aver pas qu’un a la fin : lo primus inter pares !

Pel primièr còp, França s’es balhada un donzelon qu’èra gaireben desconegut dos ans a. Mas, sens qu’aja fach cap de telerealitat, sa biografia aviá de qué exacerbar las passions dels uns e dels autres.

Pensatz, un òme maridat amb una femna plan mai vièlha qu’el e un banquièr d’afars avant de se virar cap a la politica…

E justament, d’experiéncia politica, n’aviá pas cap. E son ambicion podiá pas èsser que passadissa. Lèu lèu se tumariá a la realitat que coneissián los qu’èran dins lo « mestièr » dempuèi lustres e lustres.

Lo mestièr es benlèu çò qu’ eliminèt sos concurrents. La femna de Montretout o desvelèt tot a… son desavantatge ; per mossur Net, foguèron los « vicis esconduts » de sa vida privada, e benlèu que los cambiaments de l’insosmés de la profession de fe en òme flatonaire li faguèron mancar la seleccion finala.

Fin finala, nos trobam amb la règla dels quatre tèrces : un tèrç d’abstencions e de vòtes blancs, un tèrç per la « caudilla » e dos tèrces pel ganhaire.

Pel primièr còp dins la Cinquena Republica, lo resultat foguèt pas l’escasença d’alegresa populara e los vencits metèron pas gaire de temps per tornar trobar, fàcias als micros e camèras, las posturas e lo vocabulari costumièr per denegar tota legitimitat al president novèl.

Se compren que la drecha siá decebuda d’aver organizat son Waterloo e que vòlga aver sos Cent-jorns ! Los insosmés serián prèstes a reviscolar lo « FTP-MOI » per tornar en resisténcia…

Veirem amb las eleccions venentas mas aquela eleccion presidenciala a vist quicòm del « monde ancian » se desfar que tornarà pas qué que sián las explicacions balhadas per explicar una desfacha o una victòria…

Andriu de Gavaudan

Editorial de La Setmama, n° 1076

Repost 0
Andriu de Gavaudan - dans Anar del mond
commenter cet article
6 mai 2017 6 06 /05 /mai /2017 12:17

Tres còps qu’a cantat lo hasan…

 

Que i a ua brava estona que, pres per las nòstas cuentas electoraus, n’am pas parlat deus nòstes amics estatsunidencs. Que i a tres mes dejà que l’eraut de « Make America great again » es a la Maison Blanca ; e que i a tres mes que ne quita pas de’s renegar. Ne pòt pas acusar los democratas quitament se aquestes, qui son estats des·hèits « sus la rasa lana » de las tèrras electoraus, assajan de rebombir, damb quauques dificultats peu moment totun. La sola causa que pòden hèser qu’es de cercar bregas o tribulòcis au president navèth e de’s liurar a la felibusta entà contrariar los Republicans qui, de tota faiçon, avent la majoritat absoluda dens las duas assembladas – Congrès e Senat – e pòden hèser çò que los agrada… en principi ! Mes, en un temps que los hèits alternatius (alternative facts) e la vertat inventada (post-truth) semblan a la mòda que i a causas qui ne pòt pas estujar… La politica de santat mesa en plaça per Obama qu’es totjorn en plaça en causa de las pelejas demest los Republicans qui an felibustèrs au deguens deu lor partit. La « muralha de China » promesa entà protegir los Estatsunidencs deus sacamands de tota natura venguts deu Sud, immigrants a l’encòp « assassins » e « violaires » que sembla mau partida en causa de sos « amics » republicans que semblan trobar la factura un pauc tròp pesuga. E qué díser de la politica estrangèra quan ditz ara lo contrari de tot çò qu’ahortiscó quan èra en campanha ? L’amic Pótin, un estafièr e lo Chinés ara un parangon de vertut sens parlar de l’Otan, ger inutila e anèit indispensabla… En consequéncia, los « petits blancs » – òmes e hemnas – e los ultras qu’avèvan votat entà un mascle, supausadament « colhut » son decebuts ; e, dens los Estats ruraus republicans, las eleccions qu’èran un camin pavat de mossa que començan d’estar envasits peus arromècs.

 

Andriu de Gavaudan

 

Editorial, La Setmana, n° 1075

Repost 0
Andriu de Gavaudan - dans Anar del mond
commenter cet article
23 avril 2017 7 23 /04 /avril /2017 09:19

Trump a l’exportacion ?

O dirai pas jamai pro mas i plan longtemps que França seguís la mòda estatsunidenca dins gaireben totes los domenis.

E çò que nos ven dels Estats Units es totjorn estampilhat de bona lei !

Dison que sèm lo país ont se manja fòrt plan e ont las arts de la taula s’ameritan una reconeishença internacionala ; o vòli plan creire mas sèm tanben lo país en Euròpa que compta lo nombre mai important d’aquelas ensenhas de restauracion rapida que l’accion, qualques ans a, de José Bové a pas empachat de créisser. E s’a crescut, es que i aviá una demanda !

Dison que sèm un país ont se beu plan mas la consumacion de la bevenda nacionala estatsunidenca supera totas las autras !

Aital podèm viatjar demest los produches responsables de l’obesitat en cò dels Estatsunidencs e constatar que lor venda marcha plan en cò nòstre.

Gausarai dire qu’es tot parièr en politica… Tres meses a, los Estats Units e lo mond entièr recebèron coma un còp de punh l’eleccion d’un òme que, dins sa campanha electorala, se mostrèt un « mèstre es messorgas » qu’espandiguèt dins sos mitins mas tanben amb los bresolhadisses [en francés : un tweet] sus son telefonet intelligent. Inventèt amb son equipa los faches alternatius – « alternative facts » – e la veritat inventada – « post truth » !

Res de çò qu’aviá fach son predecssor e que voliá far la candidata democrata li agradava. Èra lo sol a poder far « America great again » !

Ailàs, après un centenat de jorns de governança caotica, quitament los Estatsunidencs que l’an portat al poder començan de s’aperceber qu’an elegit un òme cambiadís e messorguièr qu’a ja renegat la màger part de sas promessas que la mai visible es la seguenta : un còp elegit, passarai pas mon temps ajogar al gòlf coma Obama ; tot mon temps serà consacrat als problèmas qu’Obama n’es l’encausa ! E sabètz qué ? En tres meses a mai jogat al gòlf qu’Obama dins los uèit ans de sa presidénçia…

Politicians e mèdia se son trufats d’aquel arlèri del vocabulari de dos cents mots ! Nosautres, en cò nòstre, sèm pas coma aqueles piòts d’Estatsunidencs e, lo moment vengut de l’eleccion presidenciala, saurem destriar lo bon gran de l’iraga…

Aqueste ser, serem fixats !

Cronica occitana

Le Petit Bleu de Lot-et-Garonne, dimenge lo 23 d'abril de 2017

Repost 0
Andriu de Gavaudan - dans Anar del mond
commenter cet article
15 avril 2017 6 15 /04 /avril /2017 16:44

Auturoses, los Franceses ?

Encara un esfòrç e benlèu saurem contra qual nos cal votar … se votam ! Los sondatges multiples, relaiats a bodre pels mèdia, nos porgisson cada jorn una « fotografia de l’opinion a un moment m », çò dison ; e, sul fenestron, las canals d’informacions se sentisson obligadas d’« anar mai luènh amb lo dorsièr de l’eleccion », dorsièr aprigondit, de segur, que dura un parelh de minutas !

Seriá mestièr, qui sap, que recrutèsson un mèstre del suspense o un imitator del paure Leon Zitrone que comentava las eleccions coma lo Grand prèmi de Diana o d’America. Dins aquela corsa, avèm los faire-valer, los outsiders e las vedetas ; cal los uns e los autres per assegurar l’espectacle.

E d’espectacle, n’avèm… desempuèi tres o quatre meses. Encara un esfòrç e poirem far rampèl als Estats Units, « lo far de l’univèrs liure » (Fulbèrt Cant) venguts ara, amb l’administracion novèla, lo país dels faches alternatius (alternative facts) e de las novèlas inventadas (fake news).

Al moment qu’escrivi, son quatre que retenon l’atencion dels especialistas, mas amb una suspresa de talha : la desbandada del candidat PS e lo vam inesperat del candidat de l’extrèma esquèrra. E demest aqueles quatre, n’i a pas qu’un sol a se dire europèu ; los autres presican mai o mens per tornar a França son esplendor e son dardalhament perduts.

Aparentament, nòstre pòble, vengut esclau e gaireben lobotomisat en causa de l’« eurocratalha » de Brussèlas, serà mai fòrt tot solet qu’ara quand es mal acompanhat ! Aurián doblidat totes çò que devèm a una Euròpa fargada, d’una faiçon fòrça imperfacha de segur, après los dos chaples mai grands de l’epòca modèrna ?

O alara, lo fach de pensar que « sèm lo pòble mai aluserpit del planeta » nos empacha de nos acarar a las realitats. Qual a dich que los Franceses èran auturoses ?

Editorial, La Setmana, n° 1074

Repost 0
Andriu de Gavaudan - dans Anar del mond
commenter cet article

Presentacion

  • : Le blog de Andriu de Gavaudan
  • Le blog de Andriu de Gavaudan
  • : Actualitat en lenga occitana Lenga e cultura occitanas (occitan ancian e modèrne)
  • Contact

Recèrca