Overblog Suivre ce blog
Administration Créer mon blog
15 avril 2017 6 15 /04 /avril /2017 16:47

Occitan and the city…

 

O dirai pas jamai pro mas, dempuèi sèt ans ja, una « Quinzena occitana » es organizada en Òut e Garona gràcias a qualques associacions occitan(ist)as, e amb l’ajuda del départament.

En principi, los organizators ensajan de cobrir tot lo departament amb una manifestacion o una autra. Ongan, çaquelà, me sembla que la part gascona del departament, levat una conferéncia a Damazan, es estada ignorada.

Mas en general, e a condicion de se desplaçar, i aviá de matèria pels que volián de trapar quicòm dins nòstra lenga o mailèu sus nòstra lenga occitana.

Es aital qu’avèm agut confréncias suls toponims, concèrts e bals e pasejadas urbanas lucicas…

Amb son association « Agenés occitan », lo Joan Pèire Alari propausava per aquesta dimenjada de Pascas doas passejadas, comentadas en occitan e en francés, a Lairac e a ’Gen.

Dissabte, la passejada a l’entorn de Lairac propausava, jos la direccion de J. L. Granet e Gèli Grande, d’excplicacions sl païsatge, l’agricultura e son evolucion, lo bastit, la toponimia e lo poblament dins l’istòria. Lo tantòst, après un repais en comun, los participants devián ne saber un pauc mai sus las costumas de Lairac gràcias a J. L. Moreno…

La passejada d’uèi es tre qu’interessanta per çò qu’i participan, amb los adults, los drollets de la classa bilingüa de ’Gen e los calandrons de la Calandreta jansemineta.

Aquelas passejadas son una faiçon de tornar instillar un pauc d’occitan – la lenga de nòstre territòri, o cal pas dolbidar – dins la vida vidanta.

Aquel trabalh se fa jos l’egidi de l’Alari qu’es referent municipal per l’occitan e que ven de far abotir, en partida, una de sas demandas : aver los noms de las carrièras del centre vila – lo « còr de vila » tant presat pel conse – en lenga occitana.

Los Ageneses « de soca » o sabon totes que Jansemin teniá botiga pròche del Gravèr e que fasiá profieitar sos clients e los autres de sos poèmas, de sas farivòlas en « lenga gascona ». Son estatua senhoreja al ras mas es pas segur que totes sàpian qual es aquel qu’es pas ni general ni politician e que çaquelà li an fach present d’una estacion de mètro dins la capitala…

Cronica occitana, Le Petit Bleu de Lot-et-Garonne, dimenge lo 16 d'abril de 2017

Repost 0
31 mars 2013 7 31 /03 /mars /2013 19:26

Quand « Nòstra Dama » ven « Bon Encontre » ! 

Vòli pas dire mas, coma lo temps es poirit, se vos podètz pas anar passejar en causa del freg o de la pluèja, vos demòra la possibilitat de far quicòm mai que de vos abrutir devant lo fenestron o de passar tot lo sant clame del jorn a far de jòcs amb l’ordenador !

M’anatz dire que vòstre léser me regarda pas e auretz rason mas vos pòdi benlèu conselhar la lectura d’un libre…

Aqueste mes de mars a vist se debanar la quinzenada occitana [en Òut e Garona] ont, un pauc pertot dins lo departament, i a agut diferentas manifestacions e animacions pertocant nòstra lenga d’òc : seradas cantadas o contadas, conferéncias, etc.

Qualques uns demest vosautres que me legissètz de quora en quora o cada setmana n’an profechat benlèu ; es pas jamai inutil de socializar al luòc de demorar dins son canton…

Una serada passada a dançar vos ajuda a manténer la forma fisica. Una serada a enténer parlar de las costumas d’autres còps vos permet de veire tot lo camin percorrut, pel melhor o pel pièger, desempuèi qu’èretz drollet o drolleta quand èra lo temps d’abans la globalizacion ont tot es dins tot e recipròcament !

E una serada a enténer parla de toponimia ? Ongan, aviatz aquela possibilitat, la possibilitat de conéisser la significacion dels endreches ont vivètz. Me rapèli d’una remarca de l’ancian president del conselh general, J.-F. P., que disiá qu’èra pas contra la notacion del noms de las vilas e vilatges en occitan suls panèus de senhalizacion se, per cas, èran de noms occitans !

Paure d’el ! Totes ne son, de noms occitans ; e vòli plan daissar la plaça al 0,1 % dels endreches que o son pas ! Vos sètz pas jamai demandar çò que voliá lo nom del luòc-dich ont demorètz o lo nom de la vila o del vilatge qu’es lo vòstre ? La transcripcion francesa amaga plan sovent son sens e son nombroses los que balhan un sens fantasiós. Lo Dictionari toponimic dels noms de comunas d’Òut e Garona que B. Boyrie-Fénié n’es l’autora ven comolar aquela manca ; n’auretz per d’oradas de bona lectura… O vos cal crompar lèu lèu !

 

Cronica occitana

Le Petit Bleu de Lot-et-garonne

Dimenge, lo 31 de mars de 2013

 

 


Repost 0
1 août 2011 1 01 /08 /août /2011 10:57

Lo fantauma de Rodés es plan viu !

 

Coma tantes, veni de passar qualque temps a l’Estivada que s’acaba uèi dimenge a Rodés (Avairon). E se ne parli, es per vos assabentar, per çò que auretz pas agut l’escadença de veire de publicitat o de legir d’entresenhas sus aquel eveniment.

Pels mèdia exagonals, es un eveniment fantauma : n’existís pas ! Coma vòli pas far lo paranoiac, cal envisatjar al mens doas possibilitats.

La primièra es que los organizators an pas sabut trobar l’adreça dels mèdia en general e que, en consequéncia, lor an pas mandat res. Coma ne son a la XVIIIna edicion de l’eveniment, s’an pas fach assaber, dempuèi lo temps, que fasián quicòm, son vertadièrament piòts !

En mai d’aquò, coma los que pagan son las regions, aquestas serián autan piòts coma los occitanistas qu’organizon.

La segonda ipotèsi seriá que un eveniment consacrat exclusivament a la lenga e a la cultura occitanas pòt pas interessar degun e que seriá, pels mèdia, un pèrda de temps e d’argent que de i consacrar, quitament qualques regas. En mai d’aquò, los musicaires professionals, quitament se recampan tres mila personas a cada còp que cantan, devon pas èsser tròp bons que los entenon pas jamai sus las ondas nacionalas.

Vos cal pas estonar de veire vòòstra filha muda amb un rasonament aital.

Ne sèm aqui, brave monde ! Un eveniment que recampa detzenats de milièrs de personas pendent cinc jornadas e que propausa tot a gratis : concèrts, cançons, danças, discussions literàrias, etc., e òc, aquel eveniment es un non-eveniment. Que, pendent totas aquelas jornadas, i aja una convivéncia remirabla sens que i aja besonh d’una tropelada de policièrs, es pas de notar! Miracle de la francofonia franco-francesa.

Pel primièr còp ongan, totes los païses d’òc èran representats gràcias a la preséncia d’artistas venguts de la Charenta lemosina – e òc, se parla occitan al sud d’Engolèsme. Los païses d’òc cobrisson un espaci francés (lo tèrç de França) mas tanben la Val d’Aran espanhòla e las valadas italianas al nòrd de Coni (Cuneo).

Bon, avètz mancat l’Estivada de Rodés ; domatge ! mas podètz anar a l’estagi de l’escòla occitana d’estiu que se debana a Vilanuèva d’Òut del 15 al 22d’agost. A lèu de vos veire!

 

Cronica occitana

dins Le Petit Bleu de Lot-et-Garonne

dimenge 31 de julhet de 2011

 

Repost 0
5 juillet 2011 2 05 /07 /juillet /2011 00:44

Felibrejada a Belvés (Dordonha)… tota la dimenjada (2 e 3 de julhet de 2011)

 

Ongan, la felibrejada se debanava a Belvés (Dordonha) e los organisators pòdon èsser satisfaches qu’es estada una capitada. Aquesta dimenjada, la bastida foguèt envasida – pacificament de segur – pels vesins pròches o londans, pels curioses e per totes los que s’interessan a las tradicions…


DSC_0033.JPG

 

Coma cada annnada, los grops folclorics èran nombroses a far retrenir los aires de rondèu, de pòlca o de borrèia…

Coma cada annada, la taulada ramosèt un molon de monde ; los autres faguèron trabalhar los restaurants… Los curioses poguèron descobrir los apleches d’un còp èra e los mai vièlhs fasián sos comentaris als drollets.

 

DSC_0062.JPG

 

D’unes diràn que cal pas anar a una felibrajada per ausir o per parlar occitan quitament se, a l’origina, èra per promòure la lenga ; pr’aquò, lo que gausava s’adreçar en lenga d’òc a d’autres personas se vesiá pas rebufar ; au sens contra – subretot los qu’èra en « vestit » – fasián d’esfòrces bèls per vos respondre dins la mteissa lenga…

Coma lo solèlh acompanhèt la fèsta, los que i anèron ne gardaràn un bon sovenir. 


DSC_0068.JPG

 

 

Personalament, soi pas estrambordat mas cal reconéisser un qualitat granda als organizators que sabon ramosar un fum de monde que trabalhan pendent gaireben una annada per que la felibrejada siá una capitada…


Repost 0
24 juin 2011 5 24 /06 /juin /2011 17:06

Una seguida de las fotografias d'aquera Hèsta deu rondèu d'« un còp èra » (5 de junh de 1983) a Nerac (Òut e Garona)…

(Senhali que – mas aquò se vei, non ? –, levat pel filigran, las fotografias son naturalas e bio…)

 

img036

A La Garena, lo jardin on lo « reiòt », Enric IV, aimava se passejar.

 

Los vielaires Alexis Capes, Julien Déjean, un adulte e… un pichon que sembla fòrt interessat per çò que li ditz l'Alexis…

img012.jpg

 

L'acordeonaire André Mouchès e lo vriolonaire Fernand Tarrit

 

img039-copie-1.jpg

 

 

 

Los vriolonaires Robert Dubédat e Pierre Courtès

 

img043.jpg

 

 

 

 

 

img044.jpg

 

 

 

img047.jpg

 

 

Aquò vos agrada ? Vint e uèi ans a… e La Garena es totjorn aquí amb l'estatua de Floreta que, ditz la legenda, se neguèt per amor… deu reiòt. En realitat, moriguèt de sa bèla mòrt…

Repost 0
21 juin 2011 2 21 /06 /juin /2011 15:49

 

 

Ai totjorn aimat far de fotografias ; ara es de numeric mas, long ago, aquò èra d'argentic. E n'ai un molon de molons en black and white, e tanben de las diapositivas.

Las diapositivas èran reservadas als viatges e lo blanc e negre a mas activitats de jornalista « a la linha ». Aital, pagavi pas los films que m'èran balhats pel jornal e ne profechavi per « mitralhar » dins las manifestacions occitanistas…

Lo problèma es qu'adara me calriá numerizar tot aquò… Serai mòrt abans !

Ça que la, un d'aqueles que mitralhèri a l'epòca me telefonèt per me demandar se auriái pas las fotografias (fòtos) d'un eveniment que i participava : la hèsta deu rondèu a Nerac (Òut e Garona) en 1983.

Lo problèma (es lo segond) es que ai mai de tres libres e de quatre revistas sens comptar tot lo demai (privilègi de l'atge !) ; generalament, tant que l'Altzheimer me chapa pas tròp, sabi ont son las causas quitament se son dejós lo libre qu'es dejós lo libre qu'es dejós lo…

Sens Altzheimer, trobèri las fotografias de tira e los negatius ; e me soi amusat a las numerizar e tanben a las filigranar, non pas per orguèlh mas perque m'es arribat mai d'un còp de tornar trobar de fotografias sens que foguèsse fach mencion de l'autor. Es quicòm de plan corrent demest los occitanistas (o los que ne fan profession quitament se son pas los sols a far aital) que considèran que « la proprietat es lo vòl » e an pas cap d'escrupuls a se servir del trabalh dels autres sens o dire.

Ai donc filigranat las fotografias (mas es pas complicat de las « desfiligranar » per qualqu'un abituat a las aisinas numericas de segur) per çò que soi totjorn estat per tornar a Cesar çò qu'aparten a Juli !

 

(Senhali que – mas aquò se vei, non ? –, levat pel filigran, las fotografias son naturalas e bio…)

 

De naut en bas e de l'esquèrra a la drecha ;

• Michel Le Meur, Jaco Martres, Maryse Brumas, Lothaire Mabru, Jean-Claude Lambrot

• Robert Dubedat, Roger Duluc, Marcel Lagardère, Fernand Tarrit, Raymond Courtès, Michel Harrismendy

• André Mouchès, Alexis Capes, Julien Déjean, Claude Marqué, Marc Castanet

 

img002

 

Acordeonaires e vielaires :

André Mouchès, Alexis Capes, Julien Déjean, Claude Marqué

 

img007.jpg

 

 

 

 

 

Lo vielaire Alexis Capes

 

 

img008.jpg

 


Lo vielaire Julien Déjean

 

img009.jpg

 


 

img038.jpg

 

 

img037.jpg

 

 

 

Repost 0
19 septembre 2010 7 19 /09 /septembre /2010 17:20

Dishabte, lo 18 de se teme de 2010

 

A Praissac (Òut), un public hèra nombrós e estrambordat qu’assistè a Aristofanada, femnas al poder qui clavava la jornada d’aumenatge a Marcèu EsquieuDSC_0065.JPG

 

Qu’ac digó lo sénher Lassaque : « Que vau mei far un aumenatge a quaqu’un de viu que non pas devant lo clòt ! »

Lo president de l’I.E.O. d’Òut e la soa equipa qu’organizavan a Praissac ua jornada aumenatge tau Marcèu Esquieu que sarra los ueitanta primtemps. Un cinquantenat de personas que seguín las conferéncias pendent la jornada – conferéncias pertocant tota l’òbra de l’autor que sia contes, poësias, cançons, teatre, etc. – que se debanèn dens la cinèma de la vila.

 

Lo public

 

Que podom atau escotar SS. Berger, Tardiu, Delmas, la dauna Dumeaux e autes analisar lo camin d’ua vita au travèrs deus escriuts d’un òme qui a enqüèra hèra de causas a díser e a escríver.


Lo qui estó cantaire dens ua vita anteriora – un deus prumèrs cantaires de la « nòva cançon » occitana –, lo Peir-Andreu Delbeau, que vienó interpretar de cançons de Marcèu que n’avèva pas cantat dempuish bèra pausa – ça digó.

DSC_0002.JPG

En serada, qu’estó La Rampe - Teatre interegional occitan, que joguè, devant un public nombrós, Aristofanada, femnas al poder dens ua mesa en scèna de Claude Alranq. Aquesta peça qu'es en occitan naturalament mas amb de subre-títols entà que cadun posca compréner.


M. Esquieu qu’escrivó aquesta comedia en partir deux tèxtes d’Aristofanes [autor comic grèc ~450-~386], Lisistrata e l’Assemblada de las femnas. Que ne'n tirè un tèxte chucós interpretat de man de mèste per los nau comedians. Lo public, estrambordat, qui’us hasó un triomfe.

 

J.-P. Delbeau

DSC_0053.JPG

 

DSC 0058

 

DSC_0063.JPG

 

Repost 0
15 janvier 2008 2 15 /01 /janvier /2008 14:59
Me fau un plaser de far seguir aquel messatge del Joan-Loís Cortial que promòu la lenga amb un afogament extraordinari…

Association CULTURES MUSICALES
12290 Le Vibal
Tél 05 65 46 81 08
jlcortial@voila.fr


Bonjorn a totes e una plan bona annada.

Aquí de novèlas de : « CRIDALS, revòltas en país d'òc ».
« CRIDALS »… qu'es aquò ? Es un espectacle de cançons occitanas.
Foguèt la creacion oficiala del festival de l'Estivada de Rodés. E coneguèt un grand succés per sa creacion, lo dissabte 21 de julhet de 2007, que la « sala fin'amor » del festival ne veniá tròp pichona tant i aviá de mond ! undefined
CRIDALS es tanben un conte musical. Sus scèna, conti l'istòria d'una femna o d'una filha, testimòni d'un escat de revòtas en país d'òc. Atal dins d'a la Crosada contra los Catars entrò la novèla cançon occitana de las annadas 1970, en passant per la revòlta dels Croquants del Vilafrancat, dels Camisards de las Cevenas, 1907, puèi la Resisténcia a la « pèsta bruna », finissèm amb una valsa laugièra qu'evòca la revindicacion d'aquela debuta de sègle XXI, per una lenga plan viva.
ROSALINA, la cantaira de l'ex grop « FAI LUM » prèsta sa votz a aquela femna o filha que viu aqueles moments de nòstra Istòria. Es acompanhada pels sèt musicians e cantaires de la tropa de « CRIDALS ».

Ai escrich aquel espectacle coma un vertadièr « CRIDAL » de fièrtat. Uèi que sèm a la debuta del sègle XXI, e qu'un escat de joves prenon consciéncia de la dingitat de nòtra lenga, me pareis important de revindicar plan fòrt l'Istòria occitana vertadièra. DSC-0074.JPG
Ai causit d'o dire en cançons. L'idèa vos agrada ? Alara, se nos volètz sosténer … nos faretz plaser en nos venguent veire. E se l'espectacle vos agrada, puèi… seretz nòstres ambassadors : lo « boca a aurelha » es encara la melhora « pub ».

(Las fòtos son d'Andriu de Gavaudan
valent a dire de ieu !)


Aquí las datas :

vendredi 29 février    Villefranche de Rouergue    21 h 00    Théâtre
samedi 8 mars            Rodez                                  20 h 30    MJC
vendredi 14 mars        Saint Affrique                    20 h 30    Salle des fêtes
samedi 5 avril            Decazeville                         20 h 30    Salle Yves Roques

A lèu
Joan-Loís CORTIAL

Per ne saber mai sus l'estivada a venir, anatz sul siti…
http://www.estivada-rodez.com/
Repost 0

Presentacion

  • : Le blog de Andriu de Gavaudan
  • Le blog de Andriu de Gavaudan
  • : Actualitat en lenga occitana Lenga e cultura occitanas (occitan ancian e modèrne)
  • Contact

Recèrca